Bakame yahagaritswe muri Rayon Sports

Nyuma y’amajwi yasakaye ku munsi w’ejo hashize y’ikiganiro Ndayishimiye Eric bakunda kwita Bakame yagiranaga n’undi muntu, kuri ubu uyu kapiteni yahagaritswe igihe kitazwi muri iyi kipe ashinjwa kuyigambanira.

Ni imwe mu myanzuro yavuye mu nama yabaye kuri uyu wa Gatandatu tariki 9 Kamena 2018. Ni inama y’igitaraganya yahuje ubuyobozi bwa Rayon Sports.

Amakuru yizewe agera kuri Rwandamagazine.com ni uko mu myanzuro yafashwe harimo ko Bakame ahagarikwa mu gihe kitazwi mu ikipe ndetse agahita ashyikirizwa ibaruwa imuhagarika.

Kugambanira ikipe no guta akazi nta mpamvu niyo makosa yatumye ubuyobozi bwa Rayon Sports buhagarika Ndayishimiye Eric Bakame. Undi wahagaritswe ni Djemba usanzwe ari Kit Manager w’iyi kipe. Ntwari Ibrahim Djemba yahagaritswe ibyumweru 2 mu gihe na we ngo agikorwaho iperereza.

Djemba we icyo azira cyane ni ubugambanyi bikekwa ko yaba yarakoreye ikipe ku mukino Rayon Sports yatsinzwemo n’Amagaju FC. Umwe mu bantu ba hafi wa w’ikipe ya Rayon Sports yatangarije Rwandamagazine.com ko uwo munsi yari yabwiriye abakinnyi mu rwambariro ko bajya mu kibuga ariko bakaba bari butsindwe igitego 1.

Mbere y’umukino w’ikirarane wabaye kuri uyu wa Gatanu, wahuje Rayon Sports na Musanze FC bikanga 0-0, hasakaye amajwi ya Bakame aganira n’undi muntu kuri Telefone . Ni amajwi amara iminota igera ku minota 4.

Muri ayo majwi, Bakame yumvikana avuga ko atiriwe ajya ku mukino wa Musanze FC kuko ngo atari kujya ku mukino azi neza ko Rayon Sports iri butsindwemo nyuma y’uwo yari yatsinzwemo n’Amagaju 2-1 kuri Stade Amahoro.

Yavugaga ko Rayon Sports nitsindwa, umutoza azahita akubitwa n’abafana b’i Musanze bafana Rayon Sports kuko ngo ntamufana wari guturuka i Kigali. Uwo baganiraga yabwiraga Bakame ko yamenye ko umutoza w’Amagaju yari yafashijwe na Djemba (kit manager wa Rayon Sports ) ko ariwe wamufashije mu buryo bumwe cyangwa ubundi kugira ngo Rayon Sports itsindwe. Ni ibintu na Bakame yahise amuhamiriza.

Muri icyo kiganiro, Bakame akomeza avuga ko azongera gushyira imbaraga mu ikipe ari uko umutoza Minnaert amaze kugenda ndetse ko natagenda ikipe izagera ku mwanya wa 8.

Hari aho agira ati " Ejo nibadusekura, bizahita bikemuka ndabizi. …Ugira ngo se ejo muzivana hariya ?...Hariya ntiwapfa kuhava...Bisaba kuba wateguye…"

Ku wa Gatatu tariki 6 Kamena 2018, Mu nama y’igitaraganya yahuje ubuyobozi bwa Rayon Sports, abakinnyi , abatoza ndetse n’abahagarariye abafana , haganiriwe ku bibazo bimaze iminsi biri mu ikipe, hasaswa inzobe, hemezwa ko byose bikemuka mu maguru mashya.

Ni inama yateranye nyuma y’uko hari ibaruwa yo kwirukanisha umutoza yari yasinyweho n’abakinnyi 20 ba Rayon Sports ariko bamwe bakemeza ko bayisinyishijwe batazi neza ibiyerekeye. Ni igikorwa cyakozwe na Martin Rutagambwa wahoze mu buyobozi bwa Rayon Sports.

Ku bigendanye no gutsindwa n’Amagaju FC, muri iyo nama Muvunyi yagaye abakinnyi batsinzwe bakitwaza umutoza. Yababwiye ko nubwo umutoza yazagenda, hatazabura n’abakinnyi bagenda.

Ati " Niyo mwari kuba mudafite umutoza ntimwari gutsinda Amagaju kuburyo yajya kubatsinda mukitwaza umutoza? …Ntabwo mwansobanurira uburyo ikipe irimo abakinnyi b’ikipe y’igihugu y’u Rwanda ndetse n’ikipe y’igihugu cy’ Uburundi itsindwa n’Amagaju…Mbere mwitwazaga ngo ibibuga ni bibi, ni gute Amagaju aza akabatsindira kuri Stade Amahoro ?

Nubwo umutoza yagenda, mumenye ko namwe hatazabura abagenda , wenda nanjye sinzasigara ariko namwe mumenye ko bizaba bibareba."

Mu kiganiro yari yagiranye n’abanyamakuru nyuma y’umukino batsinzwemo n’Amagaju FC, Minnaert yatangaje ko abakinnyi be bakinaga badafite ubushake, ari byo byatumye batakaza amanota 3.

Icyo gihe Minnaert yagize ati " Ndababaye kuko birasa nk’aho turi kugenda dutakaza igikombe n’ubwo bitararangira, ariko birasa nkaho kiri ugenda kiduhunga." Minnaert aganira n’itangazamakuru.

Abakinnyi bakinaga nta bushake, birasa ko dukora cyane kugira ngo tugaruke mu bihe byiza."

Ubwo ikipe ya Rayon Sports yajyaga gukina na Musanze FC, Minnaert yatangarije Rwandamagazine.com ko mu bakinnyi atajyanye harimo Bakame kuko yamubwiye ko yari arwaye ariko ngo (Minnaert) yari atarabona icyemezo cya muganga.
Undi atajyanye kubera impamvu z’uburwayi ariko wari uri ku Stade Ubworoherane ni Muhire Kevin.

Bakame na we ni umwe mu bakinnyi bari mu nama yo gusasa inzobe muri Rayon Sports...inyuma ye gato hari Djemba na we wahagaritswe

Muri Nyakanga 2013 nibwo Bakame yerekeje muri Rayon Sports asinyemo imyaka 2 yagiye yongerwa. Yari avuye muri APR FC aho atari akibona umwanya kuko Ndoli Jean Claude ariwe wari umunyezamu ubanzamo muri iyo kipe icyo gihe.

Bakame yagiye muri APR FC avuye mu ikipe ya Atraco FC yavuyemo muri 2009. Kuva mu mwaka w’2007 Bakame yagiye ahamagarwa mu ikipe y’igihugu Amavubi ndetse ni na kapiteni wungirije mu ikipe y’igihugu.