Visi perezida wa Guinée Equatoriale yatangaje ko abategetsi bakorera imibonano mpuzabitsina mu biro byabo bazafatirwa “ingamba zikomeye”.
Ni nyuma y’uko amashusho menshi y’umwe mu bategetsi bakuru arimo gukora imibonano mpuzabitsina mu biro n’abagore ba bamwe mu bakomeye mu butegetsi muri icyo gihugu akwirakwiriye ku mbuga nkoranyambaga.
Visi perezida Teodoro Obiang Nguema Mangue yanditse ku rubuga X ati: “Uyu munsi, turahagarika abategetsi bose bakoreye imibonano mpuzabitsina mu biro bya ministeri.
“Leta izafata ingamba zikomeye kuri ibi bikorwa kuko bigize kurenga ku mabwiriza ngengamyitwarire.”
Ayo mashusho yasakaye ku mbuga nkoranyambaga kuva mu mpera z’icyumweru gishize nyuma yo gutabwa muri yombi kwa Baltasar Engonga umuyobozi mukuru w’ikigo cya leta gishinzwe iperereza (National Financial Investigation Agency), akekwaho ibirego bitandukanye n’aya mashusho.
Gukwirakwira kwayo kwatumye visi perezida w’iki gihugu asaba abagenzura n’abatanga serivisi za internet mu gihugu guhagarika gukomeza gukwira hose kwayo.
Amakuru avuga ko ayo mashusho yabanje gukwirakwira muri ‘groups’ za WhatsApp nyuma agera kuri Facebook, Instagram, TikTok na X.
Ayo mashusho yageze kuri izo mbuga mu gihe Baltasar yari afungiye muri gereza ya Black Beach yo ku murwa mukuru Malabo ku bindi byaha akekwaho, nk’uko bivugwa n’ikigo cya leta cy’itangazamakuru TVGE.
Umushinjacyaha mukuru w’iki gihugu, Anatolio Nzang Nguema, yavuze ko nubwo ayo mashusho bigaragara ko yafashwe ku bwumvikane bw’abakoraga imibonano, Engonga ashobora gukurikiranwa ku “byaha ku buzima bw’abantu” mu gihe basanga afite indwara zandurira mu mibonano mpuzabitsina.
Engonga ni umuhungu wa Baltasar Engonga Edjo, ukuriye komisiyo y’Umuryango w’ubukungu n’ifaranga ry’ibihugu byo muri Afurika yo hagati, uzwi nka CEMAC.
Ikwirakwira ry’aya mashusho ryateye uburakari kuri bamwe muri Equatorial Guinea, kandi yagarutsweho n’abantu benshi ku mbuga nkoranyambaga muri icyo gihugu no hanze yacyo.
BBC
