Leta Zunze Ubumwe za Amerika zohereje ubwato bugendera hasi mu mazi butwara kandi burasa ibisasu bya misile biyoborwa na za mudasobwa mu karere k’uburasirazuba bwo hagati, mu gihe hari ubwoba ko Iran yaba igiye gutera Israel.
Lloyd Austin, minisitiri w’ingabo wa Amerika, yetegetse ubwato bundi butwaye indege z’intamabara bwo bwari buri mu nzira bwerekezayo bugomba kwihuta kurushaho.
Ibi biraba mu gusubiza ku bwoba ko hagiye kwaduka intambara muri ako karere, nyuma y’uko Israel yishe abakuru b’imitwe ya Hezbollah na Hamas.
Ibi ni ikimenyetso cy’icyemezo cya Amerika cyo gufasha Israel mu gitero cyose yagabwaho na Iran – aho Austin yavuze ko Amerika “yafata ingamba zose zishoboka” mu kurwana ku nshuti yayo.
Iran irimo gukurikiranwa cyane ku kintu cyose cyagaragaza ngo ni ryari kandi ni gute yaba izasubiza Israel ku rupfu rwa Ismail Haniyeh wari umukuru wa Hamas wiciwe i Tehran tariki 31 Nyakanga(7).
Iran ishinja Israel kwicira Haniyeh ku butaka bwayo, kandi abategetsi bayo barahiye ko bazayihana. Israel ntacyo yavuze ariko byemerwa cyane ko ari yo iri inyuma y’urupfu rwa Haniyeh.
Mu itangazo ku cyumweru, Pentagon (ministeri y’ingabo za Amerika) yavuze ko Austin yohereje muri kariya karere ubwato bw’intambara bugendera munsi y’amazi bwitwa USS Georgia.
Ko kandi yategetse ubwato bw’intambara USS Abraham Lincoln butwaye indege kabuhariwe z’intambara za F-35C, kwihuta kurushaho mu rugendo burimo bwerekezayo.
Kugeza ubu ntibizwi neza icyo Iran irimo itegura gukora.
Hagati aho, igitero kuri Israel gishobora no guturuka kuri Hezbollah, umutwe wo muri Liban ufashwa na Iran.
Uyu mutwe, na wo warahiriye guhorera umukuru wawo Fuad Shukr wishwe na Israel ari i Beirut, amasaha macye mbere y’uko Haniyeh yicirwa i Tehran.
Professor Mehran Kamrava, wo muri Georgetown University muri Qatar, avuga ko kuba Amerika yatangaje ko yohereje buriya bwato bugendera hasi mu nyanja “bisobanuye gutera ubwoba Iran na Hezbollah”.
Gusa avuga ko nanone bivuze ko “hashobora kuba hari ibimenyetso ko Iran hari ikintu yaba igezeho kandi bishoboka ko igiye gutera”.
Indege nyinshi zitwara abagenzi zahagaritse ingendo zazo ku bibuga by’indege byo mu burasirazuba bwo hagati kubera ubwoba.
Kompanyi Luftansa y’Ubudage none ku wa mbere yatangaje ko ihagaritse ingendo zayo i Tel Aviv muri Israel, i Beirut muri Liban, i Amman mu murwa mukuru w’ubwami bwa Jordaniya, i Erbil muri Iraq, n’i Tehran muri Iran kugeza tariki 21 z’uku kwezi kwa Kanama “ishingiye ku busesenguzi bwayo mu by’umutekano”.
Swiss Air nayo yahagaritse ingendo zayo i Tel Aviv na Beirut muri gihe nk’icyo.
Hagati aho, Air France yo yongereye guhagarika ingendo zayo i Beirut, kugeza ku wa gatatu. Ibi, yo yabitangiye tariki 29 z’ukwezi gushize kwa Nyakanga.
BBC
