Abategetsi bo ku rwego rwo hejuru bo muri Ukraine bahishuye ko abasirikare ba Koreya ya Ruguru bakozanyijeho n’ingabo za Ukraine ku nshuro ya mbere.
Mu kiganiro n’igitangazamakuru KBS cya Koreya y’Epfo, Minisitiri w’ingabo wa Ukraine Rustem Umerov yavuze ko "itsinda rito" ry’abasirikare ba Koreya ya Ruguru ryagabweho igitero.
Perezida wa Ukraine Volodymyr Zelensky, mbere wamaganye kuba uburengerazuba bw’isi nta cyo bwakoze ku ngabo za Koreya ya Ruguru, yavuze ko izi "ngamba [urugamba] za mbere na Koreya ya Ruguru zifunguye igice gishya cy’umutekano mucye ku isi".
Ariko Koreya y’Epfo yavuze ko itemeza ko ingabo zo ku mpande zombi zarwanye "mu mirwano itaziguye", gusa yavuze ko habayeho "igikorwa" kirimo itsinda rito ry’abasirikare ba Koreya ya Ruguru "hafi y’umurongo w’imbere wo ku rugamba".
Ukraine ivuga ko abasirikare ba Koreya ya Ruguru bagereranywa ko bagera ku 11,000 bari mu karere ka Kursk ko mu Burusiya kari ku mupaka na Ukraine. Ingabo za Ukraine zifite uduce zigaruriye muri ako karere.
Mu byumweru bya vuba aha bishize, ubutasi bwa Koreya y’Epfo n’ubutasi bw’Amerika hamwe n’umuryango wo gutabarana w’Uburayi n’Amerika (OTAN), byavuze ko byabonye ibimenyetso ko ingabo za Koreya ya Ruguru zirimo kugira uruhare mu ntambara y’Uburusiya.
Ariko kugeza ubu, Uburusiya na Koreya ya Ruguru ntibirasubiza mu buryo butaziguye ku kirego na kimwe muri ibyo.
Andriy Kovalenko, umutegetsi wo hejuru wa Ukraine ushinzwe kurwanya amakuru atari ukuri yo kuyobya, ku nshuro ya mbere ku wa mbere yatangaje ku rubuga rwa Telegram ko "imitwe ya mbere ya gisirikare [ya Koreya ya Ruguru] yamaze kuraswaho i Kursk".
Mu kiganiro n’igitangazamakuru KBS cya Koreya y’Epfo, Minisitiri w’ingabo Umerov yemeje ayo makuru, avuga ko yiteze ko "umubare munini" w’ingabo za Koreya ya Ruguru ugira uruhare mu mirwano, nubwo yongeyeho ko "kugeza ubu ni ugukozanyaho gacye gusa, si ukurwana mu buryo busesuye".
Yongeyeho ko benshi muri abo basirikare bakirimo gukora imyitozo.
Umerov yagize ati: "Bambaye imyenda iranga [abasirikare b’] Uburusiya, barimo gukora imyitozo njya rugamba, ndetse barimo koherezwa mu mitwe itandukanye yo mu ngabo z’Uburusiya yo ku mirongo y’imbere ku rugamba."
Yavuze ko bishoboka ko imitwe itanu y’ingabo, buri mutwe ugizwe n’abasirikare bagera ku 3,000, izoherezwa ku rugamba.
Ntiyavuze niba hari abapfuye cyangwa abakomeretse.
Mu ijambo ryo mu buryo bwa videwo avuga buri munsi ryo kuri uyu wa gatatu, Zelensky yasabye Ukraine "hamwe n’amahanga... [gukora] ikintu icyo ari cyo cyose kugira ngo iyi ntambwe y’Uburusiya yerekeza ku kwagura intambara... inanirwe [itsindwe]. Kuri bo [Uburusiya] no kuri Koreya ya Ruguru".
Amakuru y’icyemezo nk’icyo cya Koreya ya Ruguru yatumye na Koreya y’Epfo ishya ubwoba, byongera ubushyamirane hagati y’impande zombi.
Mu mpera y’ukwezi gushize, Koreya y’Epfo yatumijeho ambasaderi w’Uburusiya muri icyo gihugu, ishaka "ivanwa aka kanya" ry’ingabo za Koreya ya Ruguru muri Ukraine. Yanaburiye ko Koreya y’Epfo irimo kwiga ku guha intwaro Ukraine mu buryo butaziguye.
Abasesenguzi bamwe bavuze ko Koreya ya Ruguru ishobora kwishyurwa, cyangwa igahabwa kugera ku ikoranabuhanga rya gisirikare ry’Uburusiya, nk’ingurane yo kubuha abasirikare bo kuburwanirira.
Kuri uyu wa gatatu, abadepite b’Uburusiya baratora bemeza amasezerano ya gisirikare na Koreya ya Ruguru. Umushinga w’ayo masezerano watanzwe bwa mbere mu ruzinduko Perezida w’Uburusiya Vladimir Putin yagiriye muri Koreya ya Ruguru muri Kamena (6) uyu mwaka.
Muri ayo masezerano, harimo ko Uburusiya na Koreya ya Ruguru bizafashanya mu gihe haba habaye "ubushotoranyi" ku gihugu icyo ari cyo cyose muri ibyo byombi.
BBC
