Igihugu cya Israel kivuga ko uburyo bw’ubwirinzi bwacyo bwitwa Iron Dome missile defence bwagifashishe kwirinda ibisasu bya Rockets biraswa n’abarwanyi ba Hamas biturutse muri Gaza.
Ingabo za Israel zivuga ko iyo batagira ubwo buryo, hari benshi bari kugwa muri ibyo bitero bya rockets muri iki gihe bari kurwana na Hamas. Ariko hari bimwe mu bisasu byabashije kugwa ku butaka bwa Israel.
Iron Dome ni iki kandi ikora gute ?
Iron Dome ikora mu buryo bwo kwirinda ibisasu birashwe biturutse hafi (short-range weapons).
Bukoresha uburyo bwa Radar mu gukurikirana ibisasu bya rockets ndetse ubu buryo bubasha gutandukanya ibisasu bishobora kugwa ahatuwe ndetse no kubidashobora kugwa ahadatuwe.
Iyo bakeneye kugira ibyo bashwanyaguza, bohereza missiles zishwanyaguza izo rockets (Interceptor missiles). Izo missiles ziraswa gusa iyo bigaragaye ko ibisasu birashwe bishora kugwa mu bice bituwemo n’abantu.
BBC dukesha iyi nkuru itangaza ko muri Israel hagiye hubatswe ubu buryo nibura buba bufite uburyo 3 cyangwa 4 bwo kurasa (launchers ) bufite ubushobozi bwo kurasa Missiles 20. Mwene ubu buryo hari ubwubatse n’ubundi bushobora kwimukanwa ( both fixed and mobile versions of the system).
Iron Dome yakoreshejwe ryari bwa mbere ?
Hatekerezwa gukora ubu buryo bw’ubwirinzi hari muri 2006 ubwo Israel yari ihanganye n’umutwe wa Hezbollah ubarizwa mu Majyepfo ya Lebanon.
Icyo gihe Hezbollah yarashe ibisasu byinshi bya rockets muri Israel byangije ibintu byinshi ndetse hapfa n’abaturage ba Israel. Icyo gihe nibwo Israel yahise ishyiraho uburyo bwo kwirinda ibyo bisasu.
Iron Dome yakozwe n’ibigo by’abanya Israel, Rafael Advanced Defense Systems n’ikigo cya Israel gishinzwe iby’ikirere , banahabwa ubufasha n’Abanyamerika.
Bwa mbere ubu buryo bukoreshwa mu ntambara hari muri 2011. Bwabashije kuburizamo ibisasu byavaga muri Gaza iyobowe na Hamas kuva muri 2007.
Muri 2019, Amerika yatangaje ko izagura ubu buryo ngo ibugerageze.
Uko ubu buryo bukora
Iron Dome ifite ubushozi bungana iki ?
Igisirikare cya Israel gitangaza ko ubu buryo bwa Iron Dome bukora ku kigero cya 90%.
Hamas ivuga ko ku gitero cyabo cya mbere yarashe rockets zigera ku 5000 nubwo igisirikare cya Israel gitangaza ko haba hararashwe kimwe cya kabiri cyayo.
Ibyo bisasu ngo byarashwe mu buryo busa n’ubukurikiranye kugira ngo bucanganyukishe uburyo bwa Iron Dome.
Igisirikare cya Israel gitangaza ko kuva tariki 7 Ukwakira 2023 kugeza nibura mu kwezi k’Ugushyingo, Israel yarashweho ibisasu bigera kuri 8000.
Bimwe mu bisasu byarashwe byashwanyagujwe na Iron Dome ibindi bimwe bigwa mu bice bituwe byica abantu binakomeretsa abandi nkuko bitangazwa n’itangazamakuru ryo muri Israel.
Igisirikare cya Amerika gitangaza ko Iron Dome itanga ubwirinzi ku kigero cya 90%
Tariki 27 Ukwakira 2023 igisasu cya Rocket cyaguye ku nzu ituwemo I Tel Aviv gikomeretsa abantu 4.
Lt Col Jonathan Conricus uvugira igisirikare cya Israel atangaza ko umubare w’abishwe n’abakomerekejwe n’ibisasu bya Hamas wari kuba munini cyane iyo batagira uburyo bwa Iron Dome, we yita ko ari uburyo bwo kurokora ubuzima (life saver).
Amerika ivuga ko izafasha Israel mu kongerera ingufu uburyo bwa Iron Dome ndetse izayiha bubiri mu bwirinzi bukomeye cyane bwa misile bw’Amerika - ari bwo Terminal High Altitude Area Defense (THAAD) hamwe n’ubwa Patriot bw’inyongera .
