Minisitiri w’intebe wa Canada Justin Trudeau yahagurutse mu Buhinde nyuma yo guherayo iminsi ibiri kubera ikibazo cya tekinike cy’indege imutwara, nk’uko bivugwa n’ibinyamakuru byo muri Canada.
Trudeau n’itsinda rye, bageze mu Buhinde kuwa gatanu bitabiriye inama ya G20 yari ikoraniye i New Delhi, bagombaga gutaha ku cyumweru ariko indege itwara Minisitiri w’intebe wa Canada yari yagaragaje ibibazo mu isuzuma riba mbere yo guhaguruka.
Ni indege ya gisirikare ya CC-150 Polaris yo mu myaka ya za 1990, yakunze kugira ibibazo tekinike mu myaka ya vuba, ndetse byitezwe ko isimbuzwa vuba.
Nyuma y’uko iki kibazo kibonetse, ingabo za Canada zohereze umutekinisiye mu Buhinde n’ibikoresho bisimbura ibyagize ikibazo, biravugwa ko uwo mutekinisiye yabashije gukemura ikibazo cy’iyi ndege.
The Canadian Press ivuga ko indege ya Trudeau yahagurutse i New Delhi kuwa kabiri ku gicamunsi. Hari hashize amasaha 48 Trudeau aheze mu Buhinde, we n’umuhungu we Xavier, n’abagendana na we.
Canada kandi yari yohereje indi ndege yo kuzana Minisitiri w’intebe wayo mu gihe iyi ikibazo cyayo cyananirana, iyo yari yoherejwe kuwa kabiri yari ihagaze gato (escale) i Londres mu Bwongereza mbere yo gukomeza.
’Yanze indege y’Ubuhinde’
Ikinyamakuru India Today kivuga ko amakuru gikesha abo muri geverinoma yemeza ko leta y’Ubuhinde yahaye Trudeau indege ya Air India One – imwe muri ebyiri zitwara perezida na visi perezida – ngo icyure Trudeau kuwa mbere, ariko uruhande rwa Canada rugahitamo gutegereza indege yabo.
Abatavugarumwe n’ubutegetsi muri Canada baboneyeho kunnyega Trudeau ku mbuga nkoranyambaga kubera iki kibazo yagize nyuma y’inama irimo umwuka utari mwiza yari yagiranye na Mininisitiri w’intebe w’Ubuhinde Narendra Modi.
Hashize imyaka umubano wa Canada n’Ubuhinde wifashe nabi, ndetse warushijeho kuba mubi mu mezi ya vuba ashize.
Kuwa kabiri India Today yatangaje ko Trudeau mu Buhinde “ntacyo yakoze mu kuzahura umubano mubi yateje ku Buhinde”.
Iminsi micye mbere y’uko ajya mu Buhinde, mu buryo butunguranye Trudeau yatangaje ko igihugu cye gihagaritse by’agateganyo ibiganiro ku masezerano y’ubucuruzi hagati y’ibihugu byombi.
Inama yamuhuje na Narendra Modi ku cyumweru nayo bivugwa ko nta byinshi yagezeho ahubwo yabayemo ikimeze nko kwihanizanya, nk’uko ibinyamakuru mu Buhinde bibivuga.
Ubuhinde na Canada bipfa iki ?
Imyigaragambyo yamagana ubutegetsi bw’i New Delhi y’abaturage b’Abahinde bo mu bwoko bw’aba-Sikh baba muri Canada niyo mpamvu y’ikibazo.
Ubuhinde butewe impungenge n’ibikorwa byabo bigamije gushaka ubwigenge bw’agace bakomokamo iwabo – Ubuhinde kandi bwahakanye ko bufite uruhare mu iyicwa ry’umwe mu mpirimbanyi zikomeye ziharanira ubwigenge bwa Sikh wiciwe mu ntara ya British Columbia ya Canada muri Kamena(6).
Mu nama yamuhuje na Trudeau ku cyumweru, Modi yamubwiye impungenge ze ku “bikorwa birwanya Ubuhinde by’abahezanguni bamwe muri Canada” amuburira ko barimo gushishikariza gucamo ibice igihugu n’urugomo, nk’uko ibiro bye byabitangaje.
Naho itsinda rya Trudeau ryavuze ko Minisitiri w’intebe wa Canada yabwiye mugenzi we “akamaro ko kubaha ubutegetsi bugendera ku mategeko, amahame ya demokarasi, n’ubusugire bw’igihugu”.
Naho ku bibazo tekinike by’indege ya Trudeau, bishobora guhinduka amateka ntazongere guhera ahandi hantu. RFI ivuga ko Canada iheruka kugura indege nshya za Airbus ndetse iya mbere bayitanze, ariko ko igomba kubanza gusuzumwa mbere y’uko ikoreshwa na Minisitiri w’intebe.
BBC
