Umukandida w’abademokarate watsinzwe amatora ya Amerika, Kamala Harris, yasabye abamushyigikiye kwemera intsinzi ya mukeba we Donald Trump, abasaba no “kudacika intege” mu kurwanira ibyo bemera.
Mu ijambo yavugiye i Washington DC, uyu visi perezida wa Amerika yavuze ko yemeye ko “ibyavuye muri aya matora si byo twashakaga”, ariko avuga ko hagomba kubaho guhererekanya ubutegetsi mu mahoro.
Trump yatsinze muri leta z’ingenzi zihagije, zirimo Pennsylvania, North Carolina na Wisconsin, bituma yegukana intsinzi, mu gihe leta nyinshi zitaratangaza ibyavuye mu matora byose.
Harris wavugiye ijambo kuri kaminuza yizeho ya Howard University, yagize ati: “Munyumve iyo mvuze ngo, urumuri rw’isezerano rya Amerika ruzakomeza kumurika iteka. Mu gihe tutazacika intege, mu gihe tuzakomeza guhatana”.
Yazamutse aho yavugiye humvikana indirimbo Freedom ya Beyoncé, maze ashimira uwo biyamamazanyaga, Guverineri wa Minnesota Tim Walz, abari bashinzwe kumwamamaza, abamushyigikiye, n’abakozi b’amatora. Mu gihe yavugaga benshi mu bari aho bihanaguraga amarira mu maso.
Na we afite ikiniga, yagize ati: “Ndabizi aka kanya hari benshi bafite amarangamutima atandukanye, ndabyumva. Ariko tugomba kwemera ibyavuye muri aya matora.”
Abamushyigikiye bumvikanye bavuza urwamo ngo ‘boooo’ ubwo yavugaga ko yavuganye na Perezida watowe Donald Trump kuri telephone, ati: “Namubwiye ko tuzamufasha we n’itsinda rye mu mpinduka. Tuzafatanya mu guhererekanya ubutegetsi mu mahoro”.
Yongeraho ati: “Mu gihe mvuye kuri aya matora,ntabwo mvuye ku rugamba rwateye uku kwiyamamaza”, mu ijambo rye yasubiyemo ijambo “kurwanira” cyangwa “guharanira” inshuro 19.
Harris wahoze ari senateri wa leta ya California, yariho ahatanira kuba umugore wa mbere, umwiraburakazi wa mbere, n’ukomoka muri Aziya y’epfo wa mbere wari kuba perezida wa Amerika.
Harris na Trump bavugaye kuri telephone ku wa gatatu, baganira ku “akamaro ko guhererekanya ubutegetsi mu mahoro no kuba perezida w’Abanyamerika bose”, nk’uko umwe mu bafasha Harris yabibwiye abanyamakuru.
Umuvugizi wa Trump yavuze ko perezida watowe “yashimye Visi perezida Harris ku mbaraga ze, ubunyamwuga, no gukomera mu kwiyamamaza kwe, kandi bombi bemeranyijwe ku kamaro ko kunga ubumwe bw’igihugu”.
Mu kindi kiganiro kuri telephone, Perezida Biden “yashimiye visi perezida ku kwiyamamaza kwe kw’amateka”, nk’uko itangazo rya White House kuri icyo kiganiro rivuga.
Ari muri White House, Biden yarebye ijambo rya Harris ririmo kuba, nk’uko umwe mu bamufasha yabivuze.
Charles Collins, umwe mu bashyigikiye Harris, yafashe indege ava i San Francisco yerekeza kuri Howard University i Washington DC ku wa gatatu.
Yabwiye BBC ati: “Ndimo guca mu gihe cy’akababaro. Ariko Kamala yadusabye gukira, kugira ngo tujye mu kazi”.
Kuri Howard University byabonekaga ko abantu ari bacye ugereranyije n’abari bahari mu ijoro ry’umunsi w’amatora ku wa kabiri. Ubu hari ugutuza.
Benshi hano bari bambaye imyenda y’umukara - aho kuba iy’iroza ryerurutse ibara riranga itsinda Kamala Harris na we yabagamo ry’abanyeshuri b’abagore ryitwa Alpha Kappa Alpha ryo kuri iyo kaminuza.
Najah Lorde umunyeshuri kuri iyi kaminuza yabwiye BBC ati: “Ubu ndumva nta kizere mfite. Ndibaza ko benshi muri twe ubu twibuze.”
Ibyavuye mu matora kugeza ubu birerekana ko abagore batoye Harris bagabanutse bagera kuri 54% ugereranyije na 57% batoye Joe Biden mu 2020.
Abirabura n’aba-Latino na bo basa n’abagabanutse mu gutora Harris kurusha uko mu myaka ine ishize batoye Biden, nk’uko ibirimo kuva mu matora bibigaragaza.
Kwiyamamaza kwa Harris kunengwa kunanirwa kuvuga ubutumwa butomoye ku bukungu, ikibazo gikomereye Abanyamerika bamaze imyaka bahura n’izamuka ry’ibiciro ku masoko.
BBC
