Inteko ishingamategeko ya Kenya yaciye kwambara ikoti (costume), ryitiriwe uwahoze ari Perezida wa Zambia Kenneth Kaunda, mu nyubako y’iyo nteko.
Umukuru w’inteko ishingamategeko ya Kenya Moses Wetangula yavuze ko amakoti ya Kaunda, cyangwa ’Kaunda suits’ nkuko azwi mu Cyongereza, hamwe n’imyambaro gakondo ya kinyafurika, bitemewe muri iyo nteko.
Perezida wa Kenya William Ruto akunze kwambara ayo makoti mu mihango yo mu ruhame y’ubutegetsi.
Ibyo byatumye ikoti rya Kaunda – rijyanishwa n’ipantalo bisa – ryamamara mu banyapolitiki.
Iryo koti ryitiriwe uwari Perezida wa Zambia, wapfuye mu 2021, wakundaga kwambara ayo makoti, agatuma yamamara mu banyapolitiki bo muri Afurika yo munsi y’ubutayu bwa Sahara.
Iryo koti, rinazwi nk’ikoti rya Mao Zedong, ntirigira ikola ndetse akenshi riba rifite amaboko magufi.
Ku wa kabiri, Wetangula yavuze ko icyemezo cye cyo guca iryo koti cyatewe n’imyambarire y’inzaduka irimo guteza inkeke ku buryo bumaze igihe bw’imyambarire yemewe mu nteko ishingamategeko.
Yavuze ko imyambarire iboneye ku bagabo "ivuze ikoti, ikola, karuvati, ishati y’amaboko maremare, ipantalo ndende, amasogisi, inkweto, cyangwa umwambaro usa uranga akazi umuntu akora".
Yagize ati: "Ku bagore, imyenda y’akazi, [imyenda] isanzwe, cyangwa imyenda isanzwe myiza, ni yo isabwa. Amajipo n’amakanzu bikwiye kuba bifite uburebure bugera munsi y’amavi kandi bikaba birimo ukwiyubaha. Amashati yorohereye [blouses] atagira amaboko arabujijwe."
Mbere, ikoti rya Kaunda ryari risanzwe ryemewe mu nteko ishingamategeko ndetse abadepite bamwe bari bazwi ko bakunda kuryambara.
Wetangula yemeye ko aya makoti ari "nkaho yari yarihanganiwe" mu gihe cyashize, ariko ko ubu igihe kigeze cyo kubihagarika, mu gihe hari inkeke ku myambarire yemewe yo mu nteko ishingamategeko.
Mu bihe bya vuba aha bishize, ikoti rya Kaunda ryagarutsweho cyane ku mbuga nkoranyambaga muri Kenya, nyuma yuko Ruto atangiye kwambara ayo makoti mu mihango yo mu ruhame y’ubutegetsi.
Guca kwambara iryo koti mu nteko kwazamuye imbamutima z’uruvange ku mbuga nkoranyambaga, bamwe bibaza impamvu "imyambaro ya kinyafurika" yacibwa n’inteko ishingamategeko yo muri Afurika, mu gihe abandi bashyigikiye icyo cyemezo.
Bamwe banannyeze uko guca iryo koti, bavuga ko ikoti rya Kaunda ubu rigiye guharirwa perezida.
Umwe mu bakoresha urubuga X (rwahoze rwitwa Twitter), yanditse ati: "Igihe uba utekereza ko nta gisigaye utarabona [ibi birabaye]... ndibaza ko amakoti ya Kaunda ubu ahariwe [perezida]."
BBC
