Ibiro bya Minisitiri w’intebe wa Israel Benjamin Netanyahu byatangaje amafoto yo mu nama hagati ya Netanyahu na Minisitiri w’ububanyi n’amahanga w’Amerika, Antony Blinken.
Ibyo biro byatangaje ku rubuga X biti: "Minisitiri w’intebe Benjamin Netanyahu ubu ari kugirana ibiganiro byo mu muhezo na Minisitiri w’ububanyi n’amahanga w’Amerika Antony Blinken, i Kirya muri Tel Aviv.
"Baranahura n’abagize Guverinoma yo mu Ntambara."
Uru ni uruzinduko rwa gatatu Blinken agiriye muri Israel kuva Hamas yahagaba igitero cyo ku itariki ya 7 Ukwakira (10) ikica abantu nibura 1,400, igashimuta abarenga 200.
Minisiteri y’ubuzima muri Gaza igenzurwa na Hamas ivuga ko abantu barenga 9,000 ari bo bamaze kwicwa muri Gaza kuva ku itariki ya 7 Ukwakira, ubwo Israel yatangiraga ibitero byo kwihorera.
Amerika yasezeranyije Israel ubufasha bwuzuye n’imfashanyo yiyongereye ya gisirikare ku bitero byayo muri Gaza, ariko habayeho impinduka mu mvugo.
Ubwo Minisitiri Blinken yerekezaga muri aka karere k’Uburasirazuba bwo Hagati kuri iyi nshuro, yavuze ku "ngamba zifatika" zo gutuma habaho kugabanya ibyago ku basivile b’Abanya-Palestine.
Ibiro bya Perezida w’Amerika (White House) byatanze igitekerezo cyuko hajya habaho guhagarika imirwano mu bice bimwe na bimwe kugira ngo imfashanyo ishobore gutangwa muri Gaza cyangwa kugira ngo hakorwe ibikorwa byo guhungisha abantu.
White House yashimangiye ko ibyo bikorwa bitageza ku gahenge, kuko yemeza ko ari Hamas yakungukiramo.
Blinken yitezwe no kugirira ibiganiro muri Jordanie (Jordan).
Uru ruzinduko rubaye mu gihe ku wa kane nimugoroba Israel yavuze ko igisirikare cyayo cyagose byuzuye umujyi wa Gaza, kandi ko abasirikare bayo bari mu mirwano yo kurasana begeranye n’abarwanyi ba Hamas.
Ingabo za Israel (IDF) zibona umujyi wa Gaza nk’izingiro ry’ibanze ry’igitero cyayo kigamije gusenya Hamas.
Ariko bisa nkaho gutera indi ntambwe bishobora kubamo intambara ikaze yo mu mujyi, ndetse ikagorana kubera ko hari abasivile babarirwa mu bihumbi byinshi hamwe n’abashimuswe na Hamas bagera kuri 240.
Umuvugizi w’ishami rya gisirikare rya Hamas yaburiye Israel ko abasirikare bayo bazasubira iwabo "mu mifuka y’umukara" (y’imirambo).
BBC
