Ambasade y’Amerika mu murwa mukuru Beirut wa Liban yashishikarije Abanyamerika kuva muri Liban "kuri tike iyo ari yo yose ihari" ("gutega iyihuse"), mu gihe ubushyamirane burimo kwiyongera cyane mu karere k’uburasirazuba bwo hagati.
Iyo nama ambasade yagiriye Abanyamerika ikurikiye indi nama nk’iyo Minisitiri w’ububanyi n’amahanga w’Ubwongereza David Lammy yagiriye Abongereza yo kuhava, avuga ko uko ibintu bimeze mu karere "bishobora kuzamba mu buryo bwihuse cyane".
Iran yasezeranyije kwihorera "bikomeye" kuri Israel, yegetseho urupfu rw’umukuru wa Hamas Ismail Haniyeh wishwe ku wa gatatu mu murwa mukuru Tehran wa Iran.
Iyicwa rye ryabaye hashize amasaha Israel yishe komanda Fuad Shukr wo muri Hezbollah mu gitero i Beirut.
Hari ubwoba ko umutwe wa Hezbollah wo muri Liban, ufashwa na Iran, ushobora kugira uruhare rukomeye muri uko kwihorera, ibyo na byo bikaba bishobora guteza igisubizo gikaze cya Israel.
Hezbollah yohereje ibisasu bya rokete bibarirwa muri za mirongo ku mujyi wa Beit Hillel wo mu majyaruguru ya Israel ahagana saa sita z’ijoro n’iminota 25 (ni ukuvuga saa tanu z’ijoro n’iminota 25 zo ku wa gatandatu ku isaha yo mu Rwanda no mu Burundi).
Amashusho yatangajwe ku mbuga nkoranyambaga agaragaza ubwirinzi bwo mu kirere bw’ibisasu bwa Israel bwa Iron Dome bufata izo rokete. Nta bantu batangajwe ko bapfuye cyangwa bakomeretse.
Minisiteri y’ububanyi n’amahanga ya Yorudaniya (Jordan) na yo yagiriye inama abaturage bayo, ibwira abari muri Liban kuhava aka kanya ndetse iburira abandi baturage bayo kutahakorera ingendo.
Canada yaburiye abaturage bayo kwirinda gukorera ingendo muri Israel, byiyongera ku nama yari yarabagiriye yo kutajya muri Liban, kubera ko mu karere "uko ibintu bimeze bishobora kuzamba kurushaho nta nteguza".
Ku wa gatandatu, ambasade y’Amerika muri Liban yavuze ko abahitamo kuguma muri Liban bakwiye "gutegura uburyo bwo guhangana n’ibibazo bishobora kubaho", ndetse bakaba biteguye "kwikinga aho hantu mu gihe kirekire".
Iryo tangazo ry’ambasade y’Amerika ryavuze ko kompanyi nyinshi z’indege zabaye zihagaritse cyangwa zikuraho ingendo, ndetse ko kompanyi nyinshi z’indege zacuruje amatike arashira, ariko "uburyo bw’ingendo bwo kuriha amafaranga bwo kuva muri Liban buracyahari".
Ibiro bikuru by’ingabo z’Amerika (Pentagon) byavuze ko bigiye kohereza andi mato y’intambara n’indege z’intambara muri ako karere, gufasha Israel kwirinda ibitero ishobora kugabwaho na Iran n’imitwe yitwaje intwaro ifashwa na Iran.
Ubwongereza bwavuze ko bugiye kohereza abandi basirikare, abakozi bo muri ambasade n’abategetsi bo mu rwego rushinzwe umutekano ku mupaka ngo bafashe mu guhungisha abaturage babicyenera – ariko bwashishikarije Abongereza kuva muri Liban "mu gihe indege zikora ingendo z’ubucuruzi zikigenda".
Kuri iki cyumweru, minisiteri y’ububanyi n’amahanga y’Ubufaransa yashishikarije abaturage babwo kuva muri Liban "mu buryo bwihuse bushoboka".
Hagati aho muri Gaza, abantu nibura 17 bari bikinze mu ishuri ricumbikiye abavuye mu byabo bishwe n’igitero cya Israel cyo mu kirere, nkuko abategetsi baho bagenzurwa na Hamas babitangaje ku wa gatandatu.
BBC
