Abakerarugendo babiri b’Abanyamerika basuye umurwa mukuru Paris w’Ubufaransa, basanzwe basinziririye mu munara wa Eiffel nyuma yo kubura uko bahava basinze, nkuko abashinjacyaha babivuze.
Mu gitondo cyo ku wa mbere ni bwo abacunga umutekano basanze abo bagabo babiri bari muri uwo munara.
Polisi yavuze ko basuye aho hantu nyaburanga ku cyumweru mu masaha ya saa yine n’iminota 40 z’ijoro (22:40), basimbuka inzitiro z’umutekano ubwo bamanukaga ku madarage.
Basanzwe mu gace ubusanzwe katagerwamo na rubanda kari hagati y’igice cya kabiri n’icya gatatu cy’uwo munara.
Abashinjacyaha b’i Paris babwiye ibiro ntaramakuru AFP ko abo bagabo "biboneka ko bahaheze kubera ukuntu bari basinze".
AFP yatangaje ko itsinda ryihariye ryo mu bazimya inkongi rishinzwe gutabara abantu baheze ahantu harehare, ari ryo ryoherejwe gukura abo bagabo muri uwo munara.
Isaha isanzwe ya saa tatu za mu gitondo (9:00) yo gufungura uwo munara yatindijwe kubera kuhatahura abo bagabo basinze.
Ikigo SETE gishinzwe ibikorwa byo ku munara wa Eiffel cyavuze ko abo bagabo nta kibazo bateje ubwo bahakurwaga.
Bombi babajijwe ibibazo na polisi y’i Paris, mu gihe ikigo SETE cyavuze ko kizatanga ikirego cyo mu rwego mpanabyaha.
Ibi bibaye nyuma yuko ku wa gatandatu habayeho gukangisha gutera ibisasu inshuro ebyiri kuri uwo munara, bituma abantu bari bahari bahungishwa inshuro ebyiri kuri uwo munsi.
Polisi y’Ubufaransa yatangiye iperereza nyuma y’izo nkeke z’ibisasu bitari ibya nyabyo zatangajwe ku rubuga rw’imikino yo mu ikoranabuhanga no ku rubuga rwa internet ruhuza abaturage na polisi.
Umunara wa Eiffel warangijwe kubakwa mu 1889, ufite uburebure bwa metero 300. Mu mwaka ushize wasuwe n’abakerarugendo miliyoni 5.8.
BBC
