Minisiteri y’Ubuzima yatangaje ko undi muntu wa kabiri yapfuye azize Icyorezo cya Covid-19 mu gihe abarwayi bashya babaye 7 abandi 7 bakaba aribo bakize ubwandu bwa Coronavirus itera Covid-19.
Umurwayi witabye Imana yari Umuplisikazi w’Imyaka 24 wari mu butumwa bw’akazi mu mahanga aho yanduriye Coronavirus aza kugarurwa mu Rwanda amaze kuremba. Icyo gihe yahise yitabwaho n’abaganga ariko yaje kwitaba Imana azize uburwayi bukomeye.
Uyu abaye uwa kabiri nyuma y’undi murwayi uherutse guhitanwa n’iki cyorezo nyuma yuko yari avuye mu mahanga.
Minisante yatangaje ko habonetse abarwayi bashya 7 ba Covid-19 mu bipimo 957 byafashwe , ibi byatumye abarwayi bose hamwe baba 384. Abandi 7 bakize Covid-19 umubare w’amaze gukira ukaba ari 269.
Kugeza ubu mu Rwanda hamaze gufatwa ibipimo 70108.
Ku isi, coronavirus imaze kwandura abantu miliyoni 6.4 abamaze kuyikira ni miliyoni 3 mu gihe abo imaze kwica ari 382.479 nk’uko bivugwa na kaminuza y’ubushakashatsi ya Johns Hopkins.
