Nyampinga (Miss) wa Nigeria, Chidimma Adetshina, yavuze ko atewe ishema no kuba yabaye uwa kabiri mu irushanwa rya Miss Universe, ndetse akagirwa Miss Afurika na Oceania.
Nyuma gato yo gutsindwa na Miss Denmark, Victoria Kjær Theilvig, wegukanye ikamba rya Miss Universe, Adetshina yagize ati: "Ntewe ishema cyane nanjye ubwanjye ndetse maze kwandika amateka."
Mbere, Adetshina yahatanye mu irushanwa rya Nyampinga w’Afurika y’Epfo, kuko yavukiye akanakurira muri icyo gihugu, ariko yaribasiwe cyane ndetse akorerwa ihohoterwa ry’urwango ku banyamahanga kuko se ari Umunya-Nigeria.
Mu kwezi gushize, abategetsi bo muri Afurika y’Epfo bavuze ko bazamwambura ibyangombwa bimuranga, nyuma y’ibirego ko nyina, ufite inkomoko muri Mozambique, yakoze uburiganya bw’"ubujura bw’umwirondoro" (w’undi muntu) kugira ngo abone ubwenegihugu bw’Afurika y’Epfo.
Adetshina, cyangwa nyina, nta n’umwe muri bo wari wagira icyo avuga kuri ibyo birego. Abategetsi bo muri Afurika y’Epfo bavuze ku kuba Adetshina ashobora kuba ataragize uruhare muri ubwo buriganya buvugwa kuko icyo gihe yari uruhinja.
Nyuma y’uburakari bwinshi muri Afurika y’Epfo, no gushidikanya ku bwenegihugu bwe, yarushanyijwe mu irushanwa rya Nyampinga wa Nigeria, araritsinda, bituma ashobora kujya mu irushanwa rya Miss Universe ryabereye mu mujyi wa Mexico muri Mexique.
Uwaje gutsindira kuba Nyampinga w’Afurika y’Epfo, Mia le Roux, yikuye mu irushanwa rya Miss Universe mu cyumweru gishize, avuga ko ari ku bw’impamvu y’uburwayi atahishuye. Yabaye uwa mbere ubana n’ubumuga bwo kutumva utsindiye ikamba rya Nyampinga w’Afurika y’Epfo.
Muri Nzeri (9) uyu mwaka, Adetshina, umunyeshuri wiga amategeko muri kaminuza, yabwiye BBC ko akibona nk’"Umunyafurika y’Epfo biteye ishema" ndetse nk’"Umunya-Nigeria biteye ishema".
Ariko nyuma yuko Miss Universe w’Afurika y’Epfo atangaje ubutumwa ku rubuga nkoranyambaga X amushimira ku kuba yabaye uwa kabiri, buherekejwe n’ibendera ry’Afurika y’Epfo n’ibendera rya Nigeria, Abanyafurika y’Epfo bamwe basubije bavuga ko atabahagarariye.
Mu kiganiro na BBC, Adetshina yavuze ko azacyenera kwivuza kugira ngo bumufashe gukira ihungabana yagize kubera kwibasirwa.
Ni we mukobwa wa mbere w’umwirabura w’Umunyafurika ugeze ku mwanya wo hejuru cyane muri Miss Universe, kuva Umunyafurika y’Epfo Zozibini Tunzi yatsinda iryo rushanwa mu mwaka wa 2019.
BBC
