Ku wa Gatandatu, tariki ya 18 Kamena 2022, ubuyobozi bwa Musanze FC bwakiriye abakinnyi n’abandi bakozi bayo bose, bubashimira uburyo bitwaye mu mwaka w’imikino wa 2021/22 ndetse bubifuriza ibiruhuko byiza.
Musanze FC yasoje Shampiyona ya 2021/22 iri ku mwanya wa gatandatu, mwiza yagize mu mateka yayo nk’uko byagenze no mu 2016/17, mu gihe mu Gikombe cy’Amahoro yagarukiye muri 1/8 isezerewe na Rayon Sports.
Uku kwitwara neza muri Shampiyona biri mu byo Umuyobozi wa Musanze FC, Tuyishimire Placide, yashimiye abakinnyi n’abandi bakozi bayo ku wa Gatandatu ubwo ubuyobozi bwari bwabakiriye ngo basangire mbere yo kujya mu biruhuko.
Yabibukije ko bagomba gukomeza kwitwara neza, bakazakoresha neza ikiruhuko cy’ukwezi kumwe cyangwa abiri bagiye kubona mbere y’uko umwaka utaha w’imikino wa 2022/23 utangira.
Abakinnyi n’abandi bakozi bafashe ijambo, na bo bashimiye ubuyobozi uburyo bwababaye hafi, bakabona buri kimwe, bizeza ko mu mwaka w’imikino utaha bazagerageza kuza imbere y’umwanya babonye.
Amafoto: Musanze FC
