Umunya-Serbia Novak Djokovic yegukanye irushanwa rya Tennis rya Wimbledon ku nshuro ya kane yikurikiranya, iya karindwi muri rusange, nyuma yo gutsinda Umunya-Australia Nick Kyrgios 4-6 6-3 6-4 7-6 (7-3) ku mukino wa nyuma wabaye kuri iki Cyumweru.
Djokovic w’imyaka 35 yahise asatira agahigo ka Rafael Nadal ko kwegukana amarushanwa menshi akomeye "Grand Slam" 22 muri Tennis y’abagabo, aho we yagize 21.
Nadal wari wasize Djokovic muri Gashyantare ubwo yatwaraga Australian Open uyu Munya-Serbia atakinnye kubera kutikingiza COVID-19, ntiyakinnye na Kyrgios muri 1/2 kubera igikomere yagize ku nda akina 1/4.
Kuri iki Cyumweru, Djokovic yagowe no gutakaza iseti ya mbere kuri Kyrgios ariko abasha kugaruka mu mukino atsinda ebyiri zakurikiyeho mu gihe iya kane yabaye ishiraniro ku mpande zombi.
Kuri ubu Djokovic aranganya Wimbledon zirindwi na Pete Sampras mu gihe Roger Federer ari we umaze kwegukana iri rushanwa inshuro nyinshi (umunani).
Mu bagore bakinnye ku wa Gatandatu, irushanwa ryegukanywe n’Umunya-Kazakhstan Elena Rybakina atsinze Umunya-Tunisia Ons Jabeur.
