Vision FC na Sunrise FC ni amwe mu makipe ane yageze muri ½ cy’imikino ya kamarampaka (play-offs) ya Shampiyona y’Icyiciro cya Kabiri nyuma yo kwitwara neza kuri uyu wa Gatatu.
Nyuma yo gusoza imikino y’amatsinda mu kwezi gushize, kuri ubu muri Shampiyona y’Icyiciro cya Kabiri hari gukinwa imikino yo gukuranwamo hashakwa amakipe azazamuka mu Cyiciro cya Mbere mu mwaka utaha w’imikino.
Imikino ya ¼ ibanza yari yabaye mu mpera z’icyumweru gishize naho kuri uyu wa Gatatu, tariki ya 8 Kamena 2022, hari hatahiwe iyo kwishyura.
Ku kibuga cy’Akarere ka Bugesera FC, Heroes FC yatunguriwe mu rugo inyagirwa na Vision FC ibitego 4-1.
Igice cya mbere cyarangiye Vision FC ifite ibitego bibiri byatsinzwe na Kayiranga Divin ku munota wa 23 ndetse na Mukunzi Vivens ku wa 41.
Mbarukuze Onesme wagiyemo asimbuye, yatsinze igitego cya gatatu ku munota wa 83 naho Kayiranga Léo atsinda icya kane ku munota wa 86.
Igitego kimwe rukumbi cya Heroes FC cyinjijwe na Cyubahiro Constantin ku munota wa gatanu w’inyongera ubwo 90 isanzwe yari yarangiye.
Gutsinda uyu mukino byahesheje Vision FC gukomeza muri ½ ku giteranyo cy’ibitego 5-3 kuko yari yatsinzwe ibitego 2-1 mu mukino ubanza.
Mu yindi mikino yabaye, Sunrise FC yasezereye Intare FC nyuma yo kuyitsinda ibitego 3-0 mu mukino wo kwishyura, igiteranyo kiba 3-1 mu mikino yombi.
Ibitego bya Sunrise FC muri uyu mukino wabereye i Nyagatare, byatsinzwe na Shyaka Claver ku munota wa kane, Yafessi Mubilu ku munota wa 33 na Rucogoza Djihad ku munota wa 37.
Muri ½, Vision FC izahura na Sunrise FC mu gihe undi mukino uzahuza Rwamagana City FC na Interforce FC.
Rwamagana City yasezereye AS Muhanga nyuma yo kuyitsindira iwayo ibitego 2-1, ikomeza ku bitego byo hanze kuko zanganyije 2-2 mu mikino yombi.
Interforce FC yakomeje kuri penaliti 10-9 nubwo yatsinzwe na Nyanza FC ibitego 2-1 mu mukino wabereye mu Majyepfo kuri uyu wa Gatatu, igiteranyo kiba 3-3.
11 Heroes FC yabanje mu kibuga
11 Vision FC yabanje mu kibuga
Birungi John washinze Vision FC yarebye uyu mukino
Perezida wa Heroes FC, Kanamugire Fidele na we yari yaje gushyigikira ikipe ye
Mukunzi Vivens watsinze igitego cya kabiri cya Vision FC
Abatoza ba Rayon Sports barebye uyu mukino
Mbarukuze Onesme watsinze igitego cya 3 cya Vision FC
Umukino urangiye, John Birungi yashimiye ikipe ye , ariko abibutsa ko amaso bayahanze muri 1/2 mu mukino bazahuramo na Sunrise FC
PHOTO:RENZAHO Christophe
