Nyuma y’aho ikipe ya Petro de Luanda yo muri Angola na FAP yo muri Cameroun ziboneye itike yo gukomeza muri ½, ikipe ya US Monastir yo muri Tunisia na Zamalek yo mu Misiri nazo zabonye itike ya ½ cy’iragiza.
Kuri iki Cyumweru taliki 22 Gicurasi 2022 ni bwo habaye indi mikino ibiri ya ¼ cy’irangiza aho ikipe ya US Monastir yo muri Tunisia yabaye iya kabiri muri BAL 2021 yasezereye Cape Town Tigers yo muri Afurika y’Epfo yitabiriye ku nshuro ya mbere ku manota 106 kuri 67.
Ikipe ya US Monastir yitwaye neza itsinda uduce twose tw’umukino ku manota 22 kuri 18, 22 kuri 15, 27 kuri 26 na 35 ku 8. Umukinnyi wa US Monastir, Michael Andre Dixon ni we watsinze amanota menshi muri uyu mukino (23).
Mu wundi mukino wa ¼, ikipe ya Zamalek BBC yo mu Misiri ifite igikombe giheruka yatsinze SLAC yo muri Guinea amanota 66 kuri 49. Iyi kipe ya Zamalek BBC yatsinze uduce dutatu tubanza tw’umukino ku manota 13 kuri 11, 20 ku 10, 20 kuri 15 hanyuma agace ka 4 aya amakipe anganya amanota 13 kuri 13.
Umukinnyi wa Zamalek BBC, Moustafa Kejo ni we watsize amanota menshi muri uyu mukino (14).
Nyuma y’imikino ya ¼ cy’irangiza biteganyijwe ko taliki 23 na 24 Gicurasi 2022 ari ikiruhuko hanyuma taliki 25 Gicurasi 2022 habe imikino ya ½ cy’irangiza.
Muri iyi mikino ya ½, ikipe ya Petro de Luanda izahura na FAP (18h00) naho ikipe ya Zamalek BBC ikine na US Monastir (21h30). Aya makipe yombi muri BAL 2021 akaba yari yahuriye ku mukino wa nyuma.
