Imikino itatu yo kwishyura muri 1/8 yabaye ku wa Gatatu yasize amakipe arindwi azakina ¼ cy’Igikombe cy’Amahoro amenyekanye mu gihe ikipe ya nyuma iva hagati ya APR FC n’Amagaju zihura kuri uyu wa Kane.
Igikombe cy’Amahoro gitanga ikipe izahagararira u Rwanda mu irushanwa Nyafurika rya CAF Confederation Cup, kiri gukinwa nyuma y’imyaka ibiri kitaba kubera COVID-19.
AS Kigali iheruka kwegukana iri rushanwa mu 2019, ni imwe mu makipe yageze muri ¼ nyuma yo gusezerera Etincelles FC ku giteranyo cy’ibitego 2-2 (2-2, 0-0) hakitabazwa itegeko ry’igitego cyo hanze.
Abanyamujyi bazahura na Gasogi United yasezereye Sunrise FC yo mu Cyiciro cya Kabiri, iyitsinze igitego 1-0 (1-1, 1-0) mu mukino wo kwishyura wabereye i Nyagatare ku wa Kabiri.
Rayon Sports yageze ku mukino wa nyuma mu 2018, yaraye isezereye Musanze FC ku bitego 3-1 (0-0, 3-1), izahura na Bugesera FC yasezereye Gicumbi FC iyitsinze igitego 1-0 mu gihe umukino ubanza wari warangiye ari ubusa ku busa.
Umukino wa gatatu wa ¼ uzahuza Police FC yasezereye La Jeunesse FC ku bitego 4-2 ( 2-2, 2-0) na Etoile de l’Est yakuyemo Mukura VS yatwaye iri rushanwa mu 2018 nyuma yo kuyitsinda ibitego 3-2 (0-1, 3-1).
Imwe mu makipe azakina umukino wa kane iramenyekana kuri uyu wa Kane nyuma y’umukino uhuza APR FC n’Amagaju FC kuri Stade ya Kigali guhera saa Cyenda.
Ikipe y’Ingabo yatsinze igitego 1-0 mu mukino ubanza wabereye i Nyamagabe mu ntangiriro z’uku kwezi. Ikomeza hagati yazo, izahura na Marines FC yakuyemo Kiyovu Sports ku bitego 2-2 (0-1, 2-1).
Imikino ya ¼ ibanza, iteganyijwe mu tariki ya 26 Mata mu gihe iyo kwishyura izakinwa tariki ya 4 Gicurasi 2022.
APR FC na Rayon Sports zishobora guhurira muri ½ kizakinwa tariki ya 11 Gicurasi na 18 Gicurasi mu gihe zaba zitwaye neza.
Biteganyijwe ko umukino w’umwanya wa gatatu n’uwa nyuma, yombi izakinwa tariki ya 17 n’iya 18 Kamena 2022.
