Amakipe ya Paris Saint-Germain, Chelsea na Borussia Dortmund na Benfica nayo yabonye itike ya 1/8 cya UEFA Champions League mu gihe Juventus yahise isezererwa nyuma yo gutsindwa na Benfica 4-3.
Kuri uyu wa Kabiri imikino ya UEFA Champions League yakomezaga hakinwa umunsi wayo wa 5 ubwo habura umunsi umwe gusa ngo imikino y’amatsinda irangire.
Kuri uyu wa Kabiri hakinnye itsinda rya 5 kugera ku itsinda rya 8. Imikino 2 yabanje gukinwa ku isaha ya saa 18:45 z’umugoroba, ikipe ya Sevilla yatsinze Copenhagen ibitego 3-0, Chelsea itsinda Salzburg ibitego 2-1 byatsinzwe na Kovacic na Havertz.
Indi mikino yari isigaye yabaye kuva ku isaha ya saa 21:00 z’ijoro, aho Zagarab yanyagiwe na Ac Milan ibitego 4-0, Manchester City inanirwa kubona igitego imbera ya Dortmund banganya ubusa ku busa.
Shakhtar na Celtic nabo banganyije igitego kimwe kuri kimwe naho Leipzig itsinda Real Madrid ibitego 3-2. Ibitego bya Leipzig byatsinzwe na Gvardiol, Nkunku na Werner mu gihe Real Madrid yatsindiwe na Vinicius Junior na Rodrygo.
Juventus yibereyeho mu bibazo, yaje gutsindwa na Benfica ibitego 4 kuri 3 byatsinzwe na Antonio Silva, Joao Mario, Rafa atsinda 2, naho Juventus itsindirwa na Kean, Milik na McKennie.
Undi mukino wo muri iryo tsinda, PSG yaje kunyagira no kwandagaza Maccabi Haifa iyitsinda ibitego 7-2. Ibitego bya PSG byatsinzwe na Messi watsinze 2, Mbappe nawe watsinze 2, Neymar, Goldberg witsinze na Carlos Soler.
Muri UEFA Champions League hazamuka amakipe abiri muri buri tsinda ubwo ni iya mbere n’iya kabiri, iya gatatu ikajya muri Europa League mu gihe iya kane iguma mu rugo.
Kugeza ubu amakipe yamaze kwizera gukomeza ni Bayern Munich, Benfica, Chelsea (yazamutse ari iya mbere), Club Brugge, Dortmund, Manchester City (yazamutse ari iya mbere), Napoli, Paris Saint-Germain na Real Madrid.
Umunsi wa nyuma w’amatsinda uzakinwa mu cyumweru gitaha.
/B_ART_COM>