UEFA Champions League: Amakipe y’ibigugu yatsikiye, amwe abona itike ya 1/8

Eric Tony Ukurikiyimfura

12 / 10 / 2022 - 06:28

Imikino y’Irushanwa rya UEFA Champions League yakomeje ku wa Kabiri, tariki ya 11 Ukwakira 2022, hakinwa Umunsi wa kane wo mu matsinda, uwa mbere wo kwishyura, yasize Maccabi Haifa yo muri Israël ibonye intsinzi ya mbere mu gihe Manchester City na Real Madrid zabimburiye izindi mu kubona itike ya 1/8 nubwo zatsikiye.

Muri iyi mikino yo kuva mu Itsinda E kugeza mu Itsinda H, Manchester City na Real Madrid zatakaje amanota ya mbere muri uyu mwaka w’imikino wa 2022/23 wa UEFA Champions League, ariko ntibyazibujije gukomeza muri iri joro ryabonetsemo intsinzi z’ingenzi ku makipe ya Chelsea na RB Leipzig.

Mu Itsinda E, Dinamo Zagreb yari yakiriye Salzburg zinganya igitego 1-1, byatumye iyi kipe ya nyuma ikomeza urugendo rwayo rwo kudatsindwa mu irushanwa ry’uyu mwaka.

Nicolas Seiwald yafunguye amazamu ku gitego yatsinze hakiri kare, ariko kwiharira umukino kwa Dinamo Zagreb yari mu rugo, mu minota isigaye y’igice cya mbere, biyihesha kwishyurirwa na Robert Ljubičić.

Undi mukino wabaye muri iri tsinda ni uwo Milan AC yari yakiriyemo Chelsea, itsindirwa mu rugo ibitego 2-0 nyuma yo guhabwa ikarita itukura kuri Fikayo Tomori wagushije Mason Mount mu rubuga rw’amahina.

Jorginho yatsinze penaliti yabonetse ku munota wa 18 mu gihe Pierre-Emerick Aubameyang yatsinze igitego cya kabiri ku mupira wari uvuye kuri Mount.

Aubameyang yishimira igitego cya kabiri cya Chelsea

AC Milan yabonye uburyo bwashoboraga kuyigarura mu mukino, ariko Olivier Giroud na Sergiño Dest wagiyemo asimbura, babupfusha ubusa.

Iyi ntsinzi yabaye iya mbere ya UEFA Champions League, Chelsea iboneye mu Butaliyani nyuma yo kuhatsindira Lazio ibitego 4-0 mu 2003.

Kuri ubu, Chelsea iyoboye itsinda n’amanota arindwi, irusha rimwe Salzburg mu gihe AC Milan na Dinamo Zagreb zinganya amanota ane.

Mu Itsinda F, ibitego bibiri byinjiye mu gice cya kabiri byafashije RB Leipzig gutsindira Celtic iwayo 2-0, inashyira iherezo ku nzozi zayo zo kurenga amatsinda.

Gutsindwa uyu mukino byatumye Celtic igeza imikino irindwi ya Champions League idatsindira mu rugo ndetse nta gitego yabonye muri itandatu y’iyo mikino.

Ku rundi ruhande, Shakhtar yari yagoye Real Madrid nyuma yo gutsindirwa na Oleksandr Zubkov nyuma y’ikiruhuko cy’igice cya mbere, yishyuwe mu minota y’inyongera ku gitego cyinjijwe na Antonio Rüdiger ku munota wa gatanu w’inyongera, zinganya igitego 1-1.

Antonio Rüdiger yahesheje Real Madrid itike ya 1/8 mu gihe hasigaye imikino ibiri mu matsinda

Kunganya byatumye Real Madrid ibona itike ya 1/8 n’amanota 10, ikurikiwe na Leipzig ifite amanota atandatu mu gihe Shakhtar Donetsk ifite atanu naho Celtic ikagira rimwe.

Mu Itsinda G, Manchester City yari yaruhukije Erling Haaland, yahagamwe na FC Copenhagen zinganyiriza muri Denmark ubusa ku busa.

Manchester City yatsinze igitego cya Rodri mu gice cya mbere ariko cyangwa kubera ko byagaragaye ko Riyad Mahrez yakoze umupira mbere yo kuwutanga.

Iyi kipe yo mu Bwongereza yahise ibona itike ya 1/8 kuko yagize amanota 10, yasoje umukino ari abakinnyi 10 nyuma y’ikarita itukura yahawe Sergio Gómez akiniye nabi Hákon Arnar Haraldsson.

Undi mukino wabaye muri iri tsinda, wasize Borussia Dortmund yiyongereye amahirwe yo gukomeza kuko yagize amanota arindwi nyuma yo kunganya na FC Seville igitego 1-1 mu Budage.

Tanguy Nianzou yafunguye amazamu ku ruhande rwa Seville yagize amanota abiri, ariko Jude Bellingham yishyurira ikipe yari mu rugo.

Mu Itsinda H, umukino wabaye kare wasize Juventus ikomeje kwibazwaho, ni nyuma y’uko yatsindiwe muri Israël na Maccabi Haifa ibitego 2-0 byinjijwe na Omer Atzili mu gice cya mbere.

Iyi ntsinzi yabaye iya mbere Maccabi yabonye muri Champions League kuva itsinze Manchester United ibitego 3-0 mu Ukwakira 2002.

Paris Saint-Germain yari mu rugo idafite Lionel Messi wavunitse, yahagamwe na Benfica zinganya igitego 1-1.

Kylian Mbappé bivugwa ko atishimye i Paris ni we watsinze kuri penaliti yari imaze gukorerwa Juan Bernat mu gihe Benfica nayo yishyuye kuri penaliti yatewe na João Mário.