UEFA Champions League: Amakipe yakomeje mu matsinda ane ya mbere yamenyekanye

Amakipe ya Tottenham na Frankfurt yiyongereye ku yamaze kubona itike ya 1/8 cya UEFA Champions League, ni nyuma y’uko ku wa Kabiri hakinwaga imikino ya nyuma yo mu matsinda kuva muri A kugeza muri D aho yasize Liverpool, Bayern Munich, FC Porto, Ajax na FC Barcelone zibonye intsinzi.

Mu Itsinda A, Liverpool yasoje iri ku mwanya wa kabiri inganya amanota 15 na Napoli ya mbere nubwo yayitsinze bitego 2-0 byinjijwe na Mohamed Salah ndetse na Darwin Núñez wasimbuye.

Igitego Salah yabonye muri uyu mukino cyatumye ageza ku gahigo ka Steven Gerrard watsindiye Liverpool ibitego 41 mu marushanwa y’u Burayi.

Ku rundi ruhande, Ajax yabonye itike ya Europa League nyuma yo gutsindira Rangers iwayo ibitego 3-1.

Rangers yahise yiyongera kuri Plzeň mu itsinda ry’amakipe 24 yatsinzwe imikino yayo yose yo mu matsinda ya UEFA Champions League.

Mu Itsinda B, FC Porto yazamutse ari iya mbere n’amanota 12 nyuma yo gutsinda Atlético Madrid ibitego 2-1 mu gihe iyi kipe yo muri Espagne yahise ibura n’umwanya muri Europa League.

Club Brugge yazamutse ari iya kabiri n’amanota 11, ni nyuma y’uko yanganyije na Bayer Leverkusen ubusa ku busa, yo yabonye itike yo gukomereza muri Europa League kuko yagize amanota atanu iyanganya na Atlético ya nyuma.

Bayern Munich yashimangiye ko ari ikipe ikomeye itsinda Inter Milan ibitego 2-0 bya Benjamin Pavard na Eric Maxim Choupo-Moting, byatumye izamuka itsinze imikino yayo yose mu Itsinda C.

Iyi ntsinzi yatumye kandi iyi kipe yo mu Budage ishyiraho umuhingo mushya wo kwinjiza igitego mu mikino 22 ya Champions League iheruka gukinira iwayo. Yabaye kandi intsinzi ya 13 yikurikiranya mu matsinda.

FC Barcelone yazamutse ari iya gatatu n’amanota arindwi, irushwa atatu na Inter, izakomereza muri Europa League nyuma yo gutsindira Plzeň iwayo ibitego 4-2.

Iyi mikino y’amatsinda yarangiye Plzeň yinjijwe ibitego 24, bingana n’ibyatsinzwe Bate Borisov mu 2014/15 na Legia Warszawa mu 2016/17.

Mu Itsinda D ryagiye gukina umukino wa nyuma bitarasobanuka, Tottenham yakoze ibyo yasabwaga itsindira Marseille mu Bufaransa ibitego 2-1, iyobora itsinda n’amanota 11 mu gihe Abafaransa basezerewe mu marushanwa y’u Burayi kuko basozanyije amanota atandatu.

Frankfurt yazamutse ari iya kabiri n’amanota 10, ni nyuma yo gutsindira Sporting CP muri Portugal ibitego 2-1.

UEFA Champions League irakomeza kuri uyu wa Gatatu, tariki ya 2 Ugushyingo, hasozwa imikino yo mu matsinda kuva muri E kugeza muri H.

Kugeza ubu amakipe amaze kubona itike ya 1/8 ni Bayern Munich (yazamutse ari iya mbere), Benfica, Chelsea (yazamutse ari iya mbere), Club Brugge, Borussia Dortmund, Frankfurt, Inter Milan, Liverpool, Manchester City (yazamutse ari iya mbere), Napoli (yazamutse ari iya mbere), Paris Saint-Germain, FC Porto (yazamutse ari iya mbere), Real Madrid na Tottenham (yazamutse ari iya mbere).

Imikino itenganyijwe kuri uyu wa Gatatu:

Itsinda E

  • Chelsea vs Dinamo Zagreb (22:00)
  • AC Milan vs Salzburg (22:00)
  • Itsinda F
  • Real Madrid vs Celtic (19:45)
  • Shakhtar vs Leipzig (19:45)

Itsinda G

  • Man City vs Sevilla (22:00)
  • Copenhagen vs Dortmund (22:00)

Itsinda H

  • Juventus vs Paris Saint-Germain (22:00)
  • Maccabi Haifa vs Benfica (22:00)
IZINDI NKURU
Ibitekerezo(0)
Tanga Igitekerezo