Ikipe y’Igihugu ya Tunisia yatsinze iy’u Bufaransa igitego 1-0 mu mukino usoza iyo mu Itsinda D, ariko isezererwa mu Gikombe cy’Isi cya 2022 kiri kubera muri Qatar.
Kuri uyu wa Gatatu ni bwo hakinwe imikino isoza amatsinda C na D nyuma y’uko ku wa Kabiri hakinnye amatsinda ya A na B.
Itsinda D ryakinnye saa Kumi n’imwe aho Tunisia yatsinze u Bufaransa igitego 1-0 cyinjijwe Whabi Khazri ku munota wa 58, ku mupira woroshye yatereye inyuma y’urubuga rw’amahina aherejwe na Aissa Laidouni.
Kuba u Bufaransa bwari bwaramaze kwizera kuzamuka ari ubwa mbere ku kigero kirenga 70%, byatumye umutoza Didier Deschamps akora impinduka nyinshi mu bakinnyi babanje mu kibuga.
Nyuma yo gutsindwa igitego, yinjijemo abarimo Kylian Mbappe, Ousmane Dembele na Antoine Griezmann, u Bufaransa burasatira karahava.
Muri uyu mukino Umunyarwandakazi Mukansanga Salima yari umusifuzi wa kane, Griezmann yishyuriye u Bufaransa ku munota wa munani w’inyongera, ari na wo wa nyuma, ariko igitego cyanzwe nyuma yo kwifashisha ikoranabuhanga ry’amashusho rya VAR bikagaragazwa ko yari yaraririye.
Gutsinda uyu mukino byatumye Tunisia igira amanota ane, ariko isoreza ku mwanya wa gatatu inyuma ya Australia yagize amanota atandatu itsinze Denmark igitego 1-0 cyinjijwe na Mathew Leckie ku munota wa 60.
Mutri 1/8, u Bufaransa buzahura n’ikipe izaba iya kabiri mu C mu gihe Australia izahura n’iya kabiri muri iryo tsinda ririmo Argentine, Arabie Saoudite, Pologne na Mexique.
Iri tsinda D rirakina saa Tatu z’ijoro aho Argentine ihura na Pologne naho Mexique ihure na Arabie Saoudite. Amakipe yose aracyafite amahirwe yo gukomeza.
Abakinnyi ba Tunisia bishimira igitego cyinjijwe na Whabi Khazri
