Kakooza Nkuriza Charles (KNC), Perezida wa Gasogi United yatangaje ko umukino ufungura Shampiyona uzahuza ikipe ye na Rayon Sports ari umunsi ngo wo gucira urubanza iyi kipe kuko ngo umukino uheruka kubahuza bamutsinze kubera ’kubogama’ kw’abasifuzi.
Kuri uyu wa mbere tariki 31 Nyakanga 2023 nibwo Ishyirahamwe ry’umupira w’amaguru mu Rwanda ryamaze gushyira hanze ingengabihe ya shampiyona ya 2023-24.
Umukino ufungura uzahuza Gasogi United na Rayon Sports tariki 18 Kanama 2023 kuri Pele Stadium guhera saa moya z’ijoro.
Mu kiganiro yagiranye na Rwandamagazine.com, KNC yavuze ko ari umukino umushimishije kuko ngo ari umunsi wo guca urubanza, arucira Rayon Sports.
Yabishingiraga ku mukino Rayon Sports yatsinze Gasogi United FC ibitego 2-1 mu mukino w’Umunsi wa 20 wa Shampiyona y’u Rwanda, wabereye kuri Stade ya Bugesera tariki ya 18 Gashyantare 2023.
Ati " Ni umukino nari maze igihe ntegereje. Ni umunsi wo guca urubanza ku byabereye mu Bugesera....Igihe kiragera, ibizabera kuri uriya munsi bizaba biteye ubwoba. Amafaranga azinjira kuri uriya mukino niyo nayafata nkayabaha kuko igikenewe hariya ni ukwerekana ukuri k’umupira."
Yunzemo ati " Mfite ubwoba ko bagiye guhagarika imikino ya gishuti. Mbikubwiye hakiri kare, Rayon Sports nzayitsinda ibitego 4-2."
KNC yavuze ko mu rwego rwo kwitegura uyu mukino, mu matariki 10 Kanama azajyana ikipe ye i Ngozi mu Burundi kwitegurirayo Shampiyona.
