Igitego cya Hakizimana Adolphe cyo mu minota ya nyuma, cyafashije Sunrise FC kwegukana Igikombe cya Shampiyona y’Icyiciro cya Kabiri itsinze Rwamagana City FC 1-0.
Kuri uyu wa Gatatu, tariki ya 29 Kamena 2022, kuri Stade ya Kigali habereye imikino isoza Shampiyona y’Icyiciro cya Kabiri.
Mu mukino wabanje, Vision FC yegukanye umwanya wa gatatu na miliyoni 1 Frw nyuma yo gutsinda Interforce FC kuri penaliti 5-4 ubwo amakipe yombi yari yanganyije igitego 1-1.
Umukino wa nyuma wahuje Sunrise FC na Rwamagana City zari zaramaze kwizera kuzamuka mu Cyiciro cya Mbere mu mwaka w’imikino utaha wa 2022/23.
Sunrise FC yari imaze umwaka umwe mu Cyiciro cya Kabiri, yegukanye Igikombe cya Shampiyona itsinze igitego 1-0 cyinjijwe na Hakizimana Adolphe ku munota wa 81.
Iyi kipe y’i Nyagatare yashyikirijwe igikombe na miliyoni 5 Frw naho Rwamagana City yaherukaga mu Cyiciro cya Mbere mu 2016, ihabwa miliyoni 3 Frw.
Aya makipe yombi yazamutse, yabisikanye na Gicumbi FC ndetse na Etoile de l’Est zasoreje mu myanya ibiri ya nyuma muri Shampiyona y’Icyiciro cya Mbere ya 2021/22.
Abakinnyi ba Sunrise FC babanje mu kibuga
Abakinnyi ba Rwamagana City FC babanje mu kibuga
