Umutoza w’ikipe y’igihugu, Amavubi, Stephen Constantine yakoresheje imyitozo ikipe y’abatarengeje imyaka 17 ya Heroes, muri gahunda yihaye yo gusura za academies akongerera ubumenyi abatoza n’abakinnyi.
Ni igikorwa yakoze kuri uyu wa gatanu tariki 8 Gicurasi 2026 kuri Stade ya Bugesera ari naho Heroes yitoreza. Mu myitozo yabahaye harimo kumenya kugarira, guhagarara neza mu kibuga ndetse n’uburyo bwo gusatira izamu.
Ni imyitozo yagiriye akamaro kanini abakinnyi ndetse n’abatoza ba Heroes. Ubu buryo bwo gusura academies, Constantine ari kubukora mu rwego rwo gufasha mu kuzamura impano z’abakiri bato mu gihugu hose.
Tariki 12 Werurwe 2026, nibwo uyu mwongereza Stephen Constantine w’imyaka 63 yongeye kugirwa umutoza w’ikipe y’igihugu, Amavubi yaherukamo hagati ya 2014 na 2015, arusiga ku mwanya wa 68.
Stephen Constantine yatangiye gutoza mu 1999 atoza ikipe y’igihugu ya Nepal yakomereje mu yandi ma kipe y’ibihugu botandukanye nka Ubuhinde, Malawi, Sudan n’andi atandukanye mbere yo kuza gutoza Amavubi 2014-2015, ahava asubira mu buhinde, Pafos, East Bengal na Pakistan yaherukagamo muri 2025 mbere yo gutangazwa n’ikipe y’igihugu Amavubi.
Stephen Constantine , umutoza Mukuru w’Ikipe y’Igihugu y, Amavubi
Muri iki gikorwa yari aherekejwe na Komiseri ushinzwe Iterambere ry’Umupira w’amaguru muri FERWAFA Fidèle Kanamugire akaba ri na we washinze kandi akaba umuyobozi w’ikipe ya Heroes FC
Mu myitozo yabahaye harimo kumenya kugarira, guhagarara neza mu kibuga ndetse n’uburyo bwo gusatira izamu
Iyi ni gahunda Stephen yihaye yo gusura za academies akongerera ubumenyi abatoza n’abakinnyi mu rwego rwo gufasha mu kuzamura impano zitandukanye mu gihugu hose
