Ubuyobozi bw’Akarere ka Huye bwatangaje ko Stade ya Huye yafunzwe by’agateganyo guhera kuri uyu wa Gatandatu kubera imirimo yo kuyitunganya.
Stade Huye ni yo yatanzwe na FERWAFA muri CAF kugira ngo izakinirweho imikino Amavubi azakira mu gushaka itike ya CAN 2023 kuko Stade ya Kigali itemewe ndetse na Stade Amahoro ikaba iri kuvugururwa.
Itangazo ry’Akarere ka Huye rivuga ko nta bindi bikorwa Stade ya Huye izakira guhera tariki ya 23 Mata 2022.
⛔Guhera kuwa 23 Mata 2022, Stade mpuzamahanga ya HUYE ifunzwe by'agateganyo kubera imirimo yo kuyitunganya. pic.twitter.com/TW5RXF9ORm
— Huye District (@HuyeDistrict) April 23, 2022
Iyi Stade iheruka kwakira umukino w’Ikipe y’Igihugu mu Ugushyingo 2018 iri gutunganywa nyuma y’uko FERWAFA yeretse Impuzamashyirahamwe ya Ruhago muri Afurika ko ari ho u Rwanda ruzajya rwakirira.
Ntibiramenyekana aho Mukura Victory Sports isanzwe ihakinira, izajya yakirira imikino yayo, ariko hari amakuru avuga ko ishobora kwimukira kuri Stade Kamena.
Mu mikino yo gushaka itike ya CAN 2023 izatangira muri Kamena, u Rwanda ruri kumwe na Sénégal, Bénin na Mozambique mu Itsinda L.
U Rwanda ruzatangira iyi mikino rwakirwa na Mozambique mu mukino uzabera i Maputo, rukurikizeho kwakira Sénégal mu mikino ibiri iteganyijwe hagati y’itariki 4 n’iya 15 Kamena 2022.
