Uwahoze ari umutoza wa Musanze FC, Seninga Innocent kuri ubu utoza Sunrise FC, yamenyesheje Ishyirahamwe ry’Umupira w’Amaguru mu Rwanda (FERWAFA) ko yahagaritse ikirego yari yarezemo iyo kipe yahozemo kuko habayeho ubwumvikane bw’impande zombi.
Seninga yirukanywe na Musanze FC nyuma yo gutsindwa na Gasogi United ibitego 4-1 ku wa 23 Gicurasi 2021.
Uyu mutoza wari usigaje umwaka umwe ku masezerano y’imyaka ibiri yari yarahawe, yareze Musanze FC mu Ishyirahamwe ry’Umupira w’Amaguru mu Rwanda (FERWAFA), ayishinja kumwirukana binyuranyije n’amategeko.
Impande zombi zagombaga kwitaba Akanama gashinzwe gukemura amakimbirane muri FERWAFA ku wa 8 Kamena 2021, ariko Seninga Innocent yavuze ko yahagaritse ikirego kubera ibiganiro n’ubwumvikane bwabayeho.
Amakuru Rwanda Magazine yamenye ni uko Seninga yasaba kwishyurwa miliyoni 8 Frw, ariko hari miliyoni 7 Frw yari yaragurijwe na Perezida wa Musanze FC, Tuyishime Placide, biba ngombwa ko yongerwa miliyoni 1 Frw kugira ngo ikibazo gikemuke burundu.
Uyu mugabo watoje amakipe arimo Isonga FC, Kiyovu Sports, Etincelles FC na Police FC, yatozaga Musanze FC ku nshuro ya kabiri, aho yari yahawe amasezerano y’imyaka ibiri muri Gicurasi 2020.
Bwa mbere ayitoza, hari mu mwaka w’imikino wa 2017/18, aho yayitoje mu mikino yo kwishyura, akayifasha kuguma mu Cyiciro cya Mbere.
Musanze FC na Seninga Innocent basoje ikibazo cyabo mu bwumvikane
Seninga Innocent yatandukanye na Musanze FC muri Gicurasi 2021 kubera umusaruro muke
