Abafana batatu ba Rayon Sports bagabiye inka umunyamakuru Sam Karenzi kubwo ngo kuba yaraharaniye impinduka muri Rayon Sports kandi zikaba zaramaze kugerwaho.
Izi nka zose Sam Karenzi yazigabiwe mu kiganiro ’Urukiko rw’Ubujurire’ cya kuri Fine FM.
Ubwo bari bahamagaye Saidi Habiyakare uba muri Amerika, asobanura uko yakiriye kubona Muvunyi Paul na Munyakazi Sadate bicaye hamwe bari gusenyera umugozi umwe ngo Rayon Sports irusheho gutera imbere, Saidi Habiyakare yavuze ko byamushimishije cyane kongera kubona abo bagabo bicaranye kandi akaba yizeye ko bagiye gushyira hamwe bikarushaho guteza imbere ikipe ya Rayon Sports.
Yaboneyeho gushimira umuntu wese wagize uruhare mu kuba ubumwe bw’aba Rayon bugezweho anaboneraho gushimira Minisitiri wa Siporo Nyirishema Richard watumye ubu bumwe bubasha kugerwaho.
Saidi Habiyakare yahise avuga ko izi mpinduka Sam Karenzi yazigizemo uruhare runini avuganira ikipe ya Rayon Sports bityo ko amugabiye inka.
Saidi ubwo yari kuri Micro za Fine FM yagize ati " Karenzi , ngukunda ntacyo umpaye ariko kubera uburyo twafatanyije nagira ngo ntibibe nka byabindi byo kuri Radio, nagira ngo nkugabire (inka). Mu izina ry’aba Rayon bose, mu izina ry’urugamba twarwanye , Kare, nguhaye inka."
Saidi yavuze ko agabiye inka Sam Karenzi kubera ubwitange mu mwuga we n’ ukuntu ahagarara ku kuri muri Siporo.
Saidi Habiyakare wagabiye inka Sam Karenzi, ni umufana ukomeye wa Rayon Sports wabaye no mu buyobozi bwayo, utuye muri Amerika
Mugisha Theogene wagabiye inka Sam Karenzi, agahita anamwoherereza amafaranga ayiguze kuri Telefone akiri mu kiganiro
Sam Karenzi wagabiwe inka 3 ari mu kiganiro, tariki 10 Kanama 2024 nibwo yahembwe nk’umunyamakuru wahize abandi muri Siporo mu Rwanda, igihembo yahawe na Rwanda Premier League
Hashize akanya Sam Karenzi yavuze ko abonye ubutumwa bw’uwitwa Mugisha na we umugabiye inka. Nyuma hari n’undi wandikiye Ricard witwa Fred bahimba Mu China na we wayigabiye Sam Karenzi, zihita ziba inka 3 yagabaniye mu kiganiro cyo kuri uyu wa Kane tariki 31 Ukwakira 2024.
Amakuru agera kuri Rwandamagazine.com ni uko uwitwa Mugisha Theogene, umufana wa Rayon Sports utuye mu Bugesera we yahise yoherereza Sam Karenzi amafaranga aguze inka kuri Telefone akoresheje uburyo bwa Mobile Money.
Sam Karenzi wari wishimye yavuze ko ari ibintu bimushimishije ko ndetse izo nka yagabiwe azagenda aziturira bagenzi be bakorana mu kiganiro Urukiko rw’Ubujurire.
