Real Madrid yatsinze FC Barcelone ibitego 3-1 muri ‘El Clasico’ ya 250, iyobora urutonde rwa Shampiyona y’Icyiciro cya Mbere muri Espagne, La Liga.
Muri uyu mukino w’Umunsi wa cyenda wabereye kuri Santiago Bernabeu, Real Madrid yafunguye amazamu ku gitego cyinjijwe na Karim Benzema ku munota wa 12 nyuma y’uko ishoti rya Vinicius Jr ryari rikuwemo na Marc-Andre ter Stegen.
Habura iminota 10 ngo amakipe yombi ajye kuruhuka, Federico Valverde yatsinze igitego cya kabiri ku ishoti yatereye muri metero nka 23.
Byasabye FC Barcelone gutegereza umunota wa 83, itsindirwa igitego na Ferran Torres ku mupira wari uvuye kuri Robert Lewandowski.
Mu gihe iyi kipe itozwa na Xavi yashakaga uko yishyura, Real Madrid yabonye penaliti ku munota wa mbere w’inyongera, yinjizwa na Rodrygo.
Gutsinda uyu mukino byatumye Real Madrid igira amanota 25 ku mwanya wa mbere, irusha atatu FC Barcelone yari igiye kumara hafi umwaka idatsindirwa hanze muri La Liga kuva itangiye gutozwa na Xavi.
Karim Benzema yishimira igitego cya mbere cya Real Madrid
Valverde yatsinze igitego cya kabiri mbere y’uko amakipe yombi ajya kuruhuka
Rodrygo yishimira igitego cya gatatu yatsinze kuri penaliti mu minota y’inyongera
Ferran Torres ni we watsindiye FC Barcelone
Lewandowski yahushije uburyo bwiza mu gice cya mbere
