Ikipe y’abagore ya Rayon Sports yatsinze Bridge FC y’i Kirehe 1-0, uba umukino wa kabiri itsinze mu cyiciro cya kabiri muri Shampiyona y’abagore.
Ni umukino wabaye kuri iki cyumweru tariki 18 Ukuboza 2022, ubera i Kirehe guhera saa munani.
Ni umukino wimuwe ku busabe bw’ikipe ya Rayon Sports WFC aho bavugaga ko itariki wari kuberaho ari nayo ikipe y’abagabo yakiriyeho APR FC.
Imanizabayo Florence niwe watsinze iki gitego ku munota wa 11. Florence yahise yuzuza ibitego 6 mu mikino 2.
Rayon Sports WFC yashinzwe muri uyu mwaka w’imikino wa 2022/23. Yatangiye gukina Icyiciro cya Kabiri inyagira Gatsibo WFC ibitego 16-0 mu mukino wa mbere bari bakinnye muri iyi shampiyona.
Mu itsinda ryayo, Rayon Sports iri kumwe na Gatsibo WFC, Bridge WFC, Nyagatare WFC, Nasho SA, Ndabuc WFC n’Indahangarwa WFC.
Axelle ushinzwe marketing muri Rayon Sports na Jeanine , umunyamabanga wa Rayon- Sports WFC bari muri bayiherekeje
