Rayon Sports WFC yanyagiye Nasho WFC 10 izamuka mu cyiciro cya 1 idatsinzwe umukino n’umwe

Iradukunda Fidele Samson

30 / 04 / 2023 - 08:32

Kuri uyu wa Gatandatu tariki 29 Mata 2023, Ikipe y’abagore ya Rayon Sports yatsinze iy’abagore ya Nasho ibitego ibitego 10-1 biyihesha kuzamuka mu cyiciro cya mbere cya shampiyona y’umupira w’amaguru y’abagore idatsinzwe umukino n’umwe.

Ikipe ya Rayon Sports y’umupira w’amaguru y’abagore, Rayon Sports Women Football Club (Rayon Sports WFC) yashinzwe mu mwaka ushize wa 2022 ikaba izamutse mu cyiciro cya mbere ikinnye mu cya kabiri umwaka umwe musa.

Ni ikipe yari igizwe n’abakinnyi b’intoranywa ndetse byasaga n’aho bari barenze cyane urwego rw’abo bakinaga bahanganye mu cyiciro cya 2 dore ko uretse kuzamuka badatsinzwe umukino mu gihe banganyije umwe musa ndetse mu mubare w’ibitego bakaba hari n’ubwo bashoboraga kunyagira ikipe bakina ibitego birenga 15 nk’uwo batsinzemo Nyagatare 16-0 mu Nzove. Hari ku ya 27 Ukuboza 2022.

Umukino umwe rukumbi banganyije ukaba ari uwarangiye banganyije na Indahangarwa WFC ibitego 2-2.

Ni mu gihe kandi no mu gikombe cy’Amahoro iyi kipe ya Rayon Sports WFC na ho yamaze gukatisha itike ya ½ aho yasezereye ikipe ya APAER WFC ku giteranyo cy’ibitego 3-1 kuko Rayon Sports yatsinze APAER ibitego 3-0 mu mukino wo kwishyura mu gihe APAER ikina mu cyiciro yari yayikoze mu jisho iyitsinda 1-0 mu mukino ubanza.

Mu mukino wabaye uyu munsi ku wa gatandatu tariki ya 29 Mata 2023, Rayon Sports WFC yari yakiriye Nasho WFC ku kibuga cyo mu Nzove aho iyi kipe ya Rayon WFC isanzwe yakirira imikino yayo.

Umukino ubanza wa 1/2, Rayon Sports yari yatsinze 3-0.

Muri uyu mukino wo kuri uyu wa gatandatu, Rayon Sports WFC yakoze ibyo imenyereweho byo gutsinda umubare munini w’ibitego aho yatsinze Nasho WFC ibitego icumi kuri kimwe(10-1).

Florance Imanizabayo na Rosine Uwiringiyimana bahimba Mbappe bombi batsinze ibitego 3 batahana impira mu gihe Dorothée Mukeshimana n’umunya Kenya Otieno Judith bo batsinze ibitego 2 buri umwe.

Rayon Sports WFC ikaba izakina shampiyona y’umupira w’amaguru mu bagore mu mwaka w’imikino wa 2023-2024. Itegereje kumenya iyo bazakina ku mukino wa nyuma bahatanira igikombe cy’icyiciro cya kabiri hagati ya APR WFC n’Indahangarwa WFC ziza gukina umukino wo kwishyura kuri iki cyumweru tariki 30 Mata 2023 i Rwinkwavu. Umukino ubanza amakipe yombi yari yanganyije 0-0.