Amakipe y’ibigugu yakinnye Umunsi wa kabiri w’amatsinda ya UEFA Champions League kuri uyu wa Gatatu, yitwaye neza uretse Chelsea yanganyije na Juventus yatsinzwe.
Kuri uyu wa Gatatu hari hatahiwe amakipe abarizwa kuva mu Itsinda E kugeza mu Itsinda H.
Mu Itsinda E, Milan AC yatsinze Dinamo Zagreb ibitego 3-1 naho Chelsea ikomeza kugorwa kuko yanganyirije iwayo na FC Salzburg igitego 1-1.
Ibitego bya Federico Valverde na Marco Asensio mu minota 10 ya nyuma byafashije Real Madrid gutsinda RB Leipzig 2-0 mu Itsinda F.
Undi mukino wo muri iryo tsinda warangiye Shakhtar Donetsk inganyije Celtic igitego 1-1
Mu Itsinda G, Manchester City yari yinjijwe igitego na Borussia Dortmund ku munota wa 56 binyuze kuri Jude Bellingham, na yo yarokotse mu minota ya nyuma.
Myugariro John Stones yayishyuriye ku munota wa 80 naho Erling Haaland atsinda igitego cya kabiri ku munota wa 84.
Muri iri tsinda kandi, FC Copenhagen yanganyije na FC Seville ubusa ku busa.
Mu gihe Juventus yatsindirwaga iwayo ibitego 2-1 na Benfica mu Itsinda H, Paris Saint-Germain yo yabashije kwikura muri Israël imbere ya Maccabi Haïfa yayibanje igitego cyinjijwe na Tyjaronn Chery ku munota wa 24.
Lionel Messi yacyishyuye ku wa 37 naho mu gice cya kabiri Kylian Mbappé na Neymar batsinda ibindi bitego byatumye umukino urangira ari 3-1.
Umukino wo mu Itsinda A utarabereye igihe, wari kuba ku wa Kabiri ukimurwa kubera itanga ry’Umwamikazi Elizabeth II, warangiye Rangers itsindiwe mu rugo na Napoli ibitego 3-0.
