Perezida wa CAF wari wafungiwe mu Bufaransa kuri uyu wa Kane, yamaze kurekurwa ndetse ntayindi gikurikirana nkuko bitangazwa na ’procureur’ wa Marseille mu Bufaransa.
Ahmad Ahmad uyobora Impuzamashyirahamwe y’umupira w’amaguru muri Afurika, CAF yari yafatiwe mu Bufaransa arafungwa aho yari ari mu Hotel i Paris akurikiranyweho ibyaha bya ruswa. Yahaswe ibibazo n’abashinzwe kurwanya ibyaha bya ruswa ndetse no kunyereza imitungo n’ imisoro (les services de l’Office central de lutte contre la corruption et les infractions financières et fiscales ,Oclif).
Kuri uyu wa Gatanu tariki 7 Kamena 2019 , ’Procureur’ wa Marseille yatangaje ko Ahmad yamaze kurekurwa ndetse nta yindi gikurikirana nkuko bitangazwa na Jeune Afrique ari nayo yatangaje bwa mbere ifungwa rya Ahmad Ahmad. Yarekuwe mu ijoro ryo kuri uyu wa Kane tariki 6 Kamena 2019 ari nawo munsi yari yafatiweho mu gitondo cyawo.
Ahmad yari akurikiranyweho gutanga isoko mu buryo bunyuranyije n’amategeko. Ni isoko ryaba ngo ryarambuwe kompanyi ya Puma mu buryo bunyuranyije n’amategeko hatubahirijwe amasezerano rigahabwa indi kompanyi yitwa Technical Steel.
Jeune Afrique ivuga ko agera ku bihumbi Magana inani mirongo itatu by’amadorali ya Amerika (830.000 $), asaga gato miliyoni 750 FRW ariyo ngo yongereweho ngo hatangwe iryo soko ari nayo afatwa nka ruswa.
Mu kwezi kwa Mata uyu mwaka, Ahmad Ahmad yari yatangaje ko ibyerekeye iryo soko byakozwe mu buryo buboneye kandi bunyuze mu buryo.
Ahmad Ahmad yari yafatiwe mu Bufaransa mu gihe hasigaye iminsi 15 hagatangira irushanwa ry’igikombe cya Afurika cy’ibihugu.
Inkuru bijyanye:
