Nyanza: Gikundiro Forever yagabiye inka uwarokotse Jenoside yakorewe Abatutsi (AMAFOTO)

Kuri uyu wa Gatandatu tariki 25 Gicurasi 2024, abafana ba Rayon Sports bibumbiye muri Gikundiro Forever bagabiye inka uwarokotse Jenoside yakorewe Abatutsi, Mushimiyimana Odette wo mu mudugudu wa Nyabisindu, Akagali ka Rwesero, Umurenge wa Busasamana, mu Karere ka Nyanza.

Ni igikorwa bakoze nyuma yo gukorana umuganda n’abaturage bo muri aka Karere, mu kagali kavuzwe haruguru. Ni umuganda kandi wanitabiriwe na Minisitiri w’Ubutabera akaba n’Intumwa nkuru ya Leta, Dr. Emmanuel Ugirashebuja akaba n’imboni y’Akarere ka Nyanza.

Wanitabiriwe kandi na Ntazinda Erasme, Mayor w’Akarere ka Nyanza ndetse n’abandi bayobozi batandukanye bo mu nzego zitandukanye.

Gikundiro Forever yari iyobowe na Dr Uwiragiye Norbert, Perezida wayo, Nshimyumurenyi Augustin, Visi Perezida wa Gikundiro Forever n’abandi bayobozi bo muri iyi fan Club.

Haba Mayor Ntazinda Erasme ndetse na Minisitiri Minisitiri w’Ubutabera akaba n’Intumwa nkuru ya Leta, Dr. Emmanuel Ugirashebuja bose bashimiye Gikundiro Forever iki gikorwa basaba n’izindi fan clubs zo mu makipe yo mu Rwanda kubigiraho ku gikorwa nk’iki.

Dr. Norbert Uwiragiye uyobora Gikundiro Forever yavuze ko iki gikorwa bagikora buri mwaka mu minsi 100 yo kwibuka Jenoside yakorewe Abatutsi, bakagira umwe mu bayirokotse baremera cyangwa bakamugabira inka. Ni ibikorwa bagiye bakorera mu turere dutandukanye harimo utwo mu Mujyi wa Kigali, Ruhango n’ahandi hatandukanye.

Mushimiyimana Odette wagabiwe inka na Gikundiro Forever yabashimiye cyane ndetse abasabira kuzakomeza gutera imbere mubyo bakora byose, abasabira umugisha ku Mana.

Ati " Ndishimye cyane kandi namwe murabibona. Ibi mwankorereye Imana izajye ibabahera umugisha iteka kandi mujye muhora mutera imbere."

Gikundiro Forever yashinzwe muri 2013, iba fan club ya mbere ya Rayon Sports yashinzwe.

Yashinzwe tariki 12 Gashyantare 2013, ishingirwa kuri groupe ya whatsApp n’abanyeshuri bigaga muri Kaminuza ya Mudende, bafite intego yo kugarura morale mu bafana ba Rayon Sports ndetse no kubagarura ku kibuga kuko icyo gihe bari batangiye gucika intege kubera ikipe yabo ititwaraga neza.

Niyo Fan Club yazanye uburyo bw’imifanire bugezweho ari nako bakora udushya dutandukanye mu mifanire ndetse bagiye babihererwa ibihembo bitanduka. Gikundiro Forver ninayo yazanye gahunda yo kuririmba indirimbo yubahiriza ikipe ya Rayon Sports bita ’Rayon ni wowe dukunda’.

Uretse gufana, banakora ibikorwa bitandukanye byo kubaka igihugu harimo gukora umuganda, kwitabira gahunda za leta zitandukanye ndetse gukangurira no gukundisha abanyarwanda gukora Siporo.

Nshimyimuremyi Augustin, Visi Perezida wa Gikundiro Forever

Afuwa, umubitsi wa Gikundiro Forever

Dr Uwiragiye Norbert uyobora Gikundiro Forever

Hagati hari Karera Moses, umunyamabanga wa Gikundiro Forever ubwo bari bavuye mu muganda wabereye mu mu Kagali ka Rwesero, Umurenge wa Busasamana