Ikipe ya Mukura Victory Sports imaze iminsi itaka ubushobozi buke n’umubare w’abakinnyi udahagije kubera ibihano bya miliyoni 46 Frw yaciwe na FIFA nyuma yo kwirukana umutoza w’Umunya-Algeria Djilali Bahloul binyuranyije n’amategeko muri Kanama 2021.
Ubuyobozi bwa Mukura Victory Sports et Loisir buherutse kwandikira Ishyirahamwe ry’Umupira w’Amaguru mu Rwanda (FERWAFA) ko butiteguye gusoza umwaka w’imikino wa 2022/23 kubera ko nta bakinnyi bahagije.
Mu ibaruwa bwanditse ku wa 22 Kanama, bwagaragaje ko kugeza ubu iyi kipe ifite abakinnyi 14 badahagije ku buryo bakina Shampiyona, isaba gukorerwa “ubuvuguzi kugira ngo ibashe kwemererwa kwandikisha abakinnyi yari yaraguze.”
Uretse kugorwa no kwandikisha abakinnyi bashya kuko biri mu bihano iyi kipe yafatiwe, Mukura VS yagowe kandi n’amikoro make ivuga ko byaturutse ku cyorezo cya COVID-19, isaba FERWAFA kuyifasha “kwishyura uwo mwenda FIFA” noneho ikajya iyishyura gahoro gahoro.
Binyuze mu bukangurambaga bwakozwe mu ngeri zitandukanye zirimo no gutegura umukino wa gicuti iyi kipe yatsinzwemo na Rayon Sports ibitego 2-1 ku wa Gatatu, amakuru ahari ubu avuga ko Mukura VS yamaze kubona miliyoni 46 Frw ndetse iri mu nzira zo kwishyura Djilali Bahloul.
Kwishyura umutoza bishobora kudakemura ibibazo bya Mukura VS
Igihano gikomeye Mukura VS yafatiwe na FIFA kubera umwenda yari ibereyemo Djilali Bahloul ni ukutemererwa kugura abakinnyi bashya hanze n’imbere mu gihugu mu gihe itarabasha kwishyura.
Gusa ibi bihano bita agaciro mu gihe ikipe yishyuriye ku gihe kandi isoko ry’igura n’igurisha ry’abakinnyi rigifunguye.
Kuri Mukura VS si ko bimeze kuko bisa nk’aho yibutse ibitereko yasheshe; isoko ry’igura n’igurisha ry’abakinnyi mu Rwanda ryafunzwe tariki ya 18 Kanama 2022 nyuma y’amezi abiri rifunguye.
Kuri ubu, bivuze ko iyi kipe nta bandi bakinnyi bashya ishobora kurambagiza uretse abo yaba yarasabiye ibyangombwa mbere y’uko isoko rifunga.
Umunya-Tunisia, Rotifi, ni we mutoza mushya wa Mukura VS
FERWAFA ni yo yagoboka Mukura VS
RwandaMagazine yagerageje kumenya abakinnyi bose Mukura VS yaba yarasabiye ibyangombwa byo gukina umwaka w’imikino wa 2022/23 mbere y’uko isoko rifunga, ariko ntitwabigezeho.
Gusa, hari amazina azwi amenyerewe muri Shampiyona y’u Rwanda akorera imyitozo i Huye nka Sekamana Maxime, Mico Justin n’abandi bivugwa ko bazakinira iyi kipe nimara kwishyura ibyo uko yabitegetswe.
Kwishyura ni kimwe ariko no kwandikisha abakinnyi ni ikindi. Iyo ikipe yahawe ibihano biyibuza kugura no kugurisha, iyo yishyuye bivaho, ariko ntibivanaho amategeko y’igihe cyo kugura abakinnyi [mu gihe cyagenwe].
Irengayobora [ku kwandikisha] riba ku bakinnyi bakina bitari ibya kinyamwuga (amateur) [bitari ibya Mukura VS] n’ababigize umwuga ariko badafite amakipe ku buryo bakenera ibyangombwa by’amakipe bari barimo.
Hari kandi n’abakinnyi ushobora kuba wari wasabiye ibyangombwa ariko ubusabe bwawe ntibuhite bwemerwa kubera bya bihano wahawe uzabanza gukemura. Iyo wishyuye, uba ushobora kubona ibyangombwa byabo.
Kuri Mukura VS, kugira ngo abakinnyi ivuga ko yumvikanye na bo, ariko bakaba badakina kubera ibyangombwa, bemererwe kuyikinira ni uko yaba yarabasabiye ‘license’ muri FERWAFA mbere y’uko isoko rifunga ku wa 18 Kanama 2022.
Mu gihe Mukura VS yaba imaze kwishyura, si bwo yemerewe kujya gushaka abakinnyi yazakoresha. Bigenze gutyo yaba ihawe igihe kirenze icyo andi makipe yahawe, muri make byaba ari ugushyirwa ku ibere.
Iyi kipe yambara umuhondo n’umukara yatangiye Shampiyona itsindwa na Gasogi United 1-0. Mu gihe umukino w’Umunsi wa kabiri wari kuyihuza na AS Kigali wasubikwa kubera imikino ya CAF Confederation Cup, izasubira mu kibuga ihurana Espoir FC tariki ya 15 Nzeri 2022.
Kuri ubu Mukura VS ifite abakinnyi biganjemo abakiri bato
