Uwahoze ari Perezida wa Rayon Sports, Munyakazi Sadate n’umuhungu we, babaye aba mbere batari mu buyobozi bw’ikipe baguze Itike y’Umwaka w’Imikino ya Rayon Sports ifite agaciro ka miliyoni 1 Frw.
Ku wa Kane, tariki ya 11 Kanama 2022, ni bwo Rayon Sports yamuritse uburyo bwo kugura Itike y’Umwaka w’Imikino n’Ikarita y’Ubunyamuryango.
Itike y’Umwaka w’Imikino ya Rayon Sports iri mu byiciro bitatu birimo Gold, Silver na Bronze ifasha abakunzi bayo kurebera buri mikino y’amarushanwa yakiriye n’iyo yateguye mu myanya bihitiyemo irimo VVIP, VIP n’ahatwikiriye bitewe n’uko umuntu yishyuye.
Ku ikubitiro, Perezida w’Umuryango wa Rayon Sports, Uwayezu Jean Fidèle n’Umubitsi wawo, Ndahiro Olivier, bahise bagura Itike ya “Gold”, igura miliyoni 1 Frw nk’uko byatangarijwe mu kiganiro n’abanyamakuru cyabereye muri Grazia Apartment ku wa Kane.
Amakuru Rwanda Magazine yamenye ni uko uwahoze ari Perezida wa Rayon Sports, Munyakazi Sadate wayiyoboye hagati ya Nyakanga 2019 na Nzeri 2020, na we yaguze itike y’umwaka w’imikino ifite agaciro ka miliyoni 1 Frw.
Si we gusa kuko n’umuhungu we, Ganza Gisa Sadate Junior, yamuguriye itike ya miliyoni 1 Frw izamufasha kureba imikino yose Rayon Sports izakira n’iyo izategura.
‘Itiye ya Gold’ aba bose baguze ihesha uyifite uburenganzira bwo kwinjira mu kanama ngishwanama ka Komite ya Rayon Sports, kuba umwe mu bashobora gutumirwa mu Nteko rusange ya Rayon Sports no guhabwa igabanyirizwa ku bikorwa by’abafatanyabikorwa bose ba Rayon Sports.
Imuhesha kandi uburenganzira bwo kwinjira ku mikino yose ya Rayon Sports yakiriye cyangwa yateguye, agahabwa icyicaro gihoraho mu gice cya VVIP ndetse akinjirira mu muryango wa VVIP aho aba anemerewe ‘Parking’ mu gihe Rayon Sports yakiriye imikino.
Uyifite yemerewe kwiyakira mu gihe cy’ikiruhuko ku mukino, guhabwa umwambaro wa Rayon Sports, kwinjira nta kiguzi ku myitozo ya Rayon Sports, guhabwa ubutumire bwa VVIP mu bikorwa bya Rayon Sports ndetse afite uburenganzira bwo kubona amafoto n’amashusho bya Rayon Sports.
Inkuru bifitanye isano: Imitirere y’Itike za Saison n’Amakarita y’Ubunyamuryango yamuritswe na Rayon Sports
Munyakazi Sadate wahoze ayobora Rayon Sports, yabimburiye abandi batari mu buyobozi kugura itike ya Gold ifite agaciro ka miliyoni 1 Frw
Ganza Gisa Sadate Junior, umuhungu wa Sadate, na we yaguriwe itike izamufasha kureba imikino yose ya Rayon Sports yicaye muri VVIP
Perezida w’Umuryango wa Rayon Sports, Uwayezu Jean Fidèle, ni we waguze itike ya mbere ya Gold ku wa Kane
Umubitsi w’Umuryango wa Rayon Sports, Ndahiro Olivier, na we yaguze itike ya Gold ku wa Kane
