Mu nama yahuje abayobozi b’amakipe yo mu cyiciro cya mbere yo mu Rwanda, umuyobozi wa Rwanda Premier League icunga Shampiyona y’Icyiciro cya Mbere, Mudaheranwa Hadji Youssuf, yavuze ko urugendoshuri rw’iminsi itatu bagiriye muri Tanzania rwari ingenzi kuko basanze hari byinshi bari bakwiye kwigira ku mikoranire ya Federasiyo na League byaho.
Kuri uyu wa Gatanu tariki 22 Ukuboza 2023 hateranye inama y’abayobozi b’amakipe yo mu cyiciro cya mbere mu Rwanda ari nabo bagize abanyamuryango ba Rwanda Premier League. Ni inama yabereye ku Kicukiro muri Nobleza Hotel.
Imwe mu ngingo yagarutsweho na Perezida wa Rwanda Premier League ni urugendoshuri baheruka kugirira muri Tanzania.
Ni urugendoshuri bakoze kuva tariki 12 Nzeri kugeza tariki 16 Nzeri 2023. Uru rugendoshuri rwakozwe na bamwe mu bayobozi ba Rwanda Premier League n’ab’Ishyirahamwe ry’Umupira w’Amaguru mu Rwanda (FERWAFA), berekeza i Dar es Salaam muri Tanzania.
Rwanda Premier League yari ihagarariwe na Perezida wayo, Mudaheranwa Youssuf Hadji; Visi Perezida, Mvukiyehe Juvénal n’Umunyamabanga wayo, Gahigi Jean Claude.
Ku ruhande rw’Ishyirahamwe ry’Umupira w’Amaguru mu Rwanda hagiye Visi Perezida wa Kabiri ushinzwe Tekinike akaba no mu bagize Inama y’Ubuyobozi ya Rwanda Premier League, Mugisha Richard n’Umujyanama mu by’Amategeko, Jules Karangwa.
Mu minsi itanu bamaze muri Tanzania, basuye ibikorwa bitandukanye, bagirana ibiganiro n’ubuyobozi bw’Ishyirahamwe ry’Umupira w’Amaguru muri Tanzania (TFF) n’ubwa Shampiyona y’Icyiciro cya Mbere muri icyo gihugu. Basuye kandi amakipe ya Simba SC na Azam FC.
Ubufatanye na Federation ndetse n’ubufatanye n’itangazamakuru
Hadji Youssuf yabwiye abayobozi b’amakipe yo mu Rwanda ko ikintu cya mbere basanze cyarafashije League ya Tanzania ari uburyo bakorana neza na Federation yaho. Imikoranire myiza kandi ngo iri no hagati ya League n’itangazamakuru ryaho ku buryo nta muntu uca intege abaturage ku buryo byagabanya umubare w’abitabira imikino.
Ati " Ni ikintu gikomeye. N’inaha twarabitangiye gukorana neza n’itangazamakuru kuko ni umusingi ukomeye ku kwitabirwa kw’imikino. Federation y’umupira w’amaguru hano nayo turakorana neza cyane kandi bizagira byinshi bidufasha mu guteza imbere umupira wacu."
Umubare w’abanyamahanga
Tanzania ni kimwe mu bihugu bimaze gutera imbere mu mupira w’amaguru haba ku rwego mpuzamahanga n’imbere mu gihugu.
Ikipe y’Igihugu yayo yabonye itike y’Igikombe cya Afurika ku nshuro ya kabiri mu myaka ine, ni mu gihe ku rwego rw’amakipe, Simba SC iri mu makipe umunani yakinnye "Africa Super League" naho Young Africans ikaba iheruka kugera ku mukino wa nyuma wa CAF Confederation Cup.
Ikindi yashimangiye cyafashije Tanzania kuba ifite shampiyona ikomeye ku rwego rwa Afurika ngo ni umubare w’abanyamahanga bajya ku rupapuro rw’imikino. Muri Tanzania, abanyamahanga 12 nibo bemerewe kujya ku rupapuro rw’umukino.
Ati " Abanyamahanga benshi bazamura urwego rwo guhatana. Na hano kuba twarabongereye, mwabonye ko urwego rw’abakinnyi b’abanyarwanda rwazamutse ku buryo bugaragara. Mwabonye Mugisha Gilbert, mwabonye uko ba Nshuti Innocent bazamuye urwego n’abandi batandukanye. "
Yunzemo ati " Navuga ko hari imbaraga batakoreshaga mbere ubu basigaye bakoresha kubera guhatana ari naho havuye umusaruro ikipe y’igihugu, Amavubi ifite mu mikino 2 iheruka."
Kwamamaza
Ikindi ngo asanga cyarafashije cyane League ya Tanzania, ni umubare w’abamamaza benshi. Muri Tanzania, ku mwaka ngo League yaho yinjiza agera kuri Miliyoni 67 z’amashiringi (Miliyoni 33.5 FRW) avuye mu kwamamaza.
Aha niho yahereye avuga ko nabo bagiye gushaka uko bongera abamamaza mu bintu bitandukanye haba ku kibuga kugeza ku gukoresha abakinnyi bari muri League mu kwamamaza abafatanyabikorwa batandukanye.
Mu Rwanda, uyu mwaka w’imikino wa 2023/24 niwo wa mbere wa Shampiyona y’Icyiciro cya Mbere iri mu maboko ya Rwanda Premier League.
Perezida wa Rwanda Premier League, Mudaheranwa Hadji Yussuf niwe wayoboye iyi nama. Yabwiye mu ncamake abayobozi b’amakipe yo mu Rwanda amabanga bigiye kuri Shampiyona ya Tanzania
Mvukiyehe Juvenal nyiri Addax FC akaba no mu buyobozi bwa Rwanda Premier League
Chairman wa APR FC, Col. Karasira Richard akaba no muyobozi bwa Rwanda Premier League
Perezida wa Rayon Sports Uwayezu Jean Fidele yari muri iyi nama
Umunyamabanga wa Rwanda Premier League, Gahigi Jean Claude akaba wa Perezida wa Bugesera FC
Mugisha Richard, Visi Perezida wa Kabiri ushinzwe Tekinike uri no mu bagize Inama y’Ubuyobozi ya Rwanda Premier League na we uri mu bari mu rugendoshuri rwo muri Tanzania
Desire Niyitanga uyobora Gicumbi FC akaba no mu buyobozi bwa Rwanda Premier League
PHOTO:RENZAHO CHRISTOPHE
