Kuri uyu wa Gatanu tariki 5 Ukuboza 2025, ikipe ya Rayon Sports yatsinze Musanze FC ibitego 2-0 mu mukibo wabereye kuri Kigali Pele Stadium, abafana bayo bongera kumwenyura iba n’intsinzi ya mbere kuri Komite y’Inzibacyuho iyobowe na Murenzi Abdallah.
Ku munota wa gatanu Tony Kitoga yafunguye amazamu ku gitego yatsinze ku ishoti rikomeye yatereye hanze y’urubuga rw’amahina.
Aziz Bassane yazamukanye umupira mwiza ku ruhande rw’iburyo awuhindura imbere y’izamu Habimana Yves atsinda igitego cya kabiri ku munota wa 34.
Musanze FC yahise ikora impinduka, Nkurunziza Felicien na Lubila Katembo basimburwa na Niyitanga Emmanuel na Bizimungu Omar.
Ku munota wa 44, Murangamirwa Serge yahawe ikarita y’umutuku nyuma yo gukubita inkokora mu maso Aziz Bassane.
Umukino warangiye Rayon Sports yatsinze Musanze FC ibitego 2-0.
Indi mikino yabaye uyu munsi, Kiyovu Sports yanyagiye Etincelles FC ibitego 4-1, mu gihe Mukura yatsinze Bugesera igitego 1-0.
Shampiyona izakomeza ku wa Gatandatu, aho Gasogi United izakina na Marine FC, AS Muhanga na Amagaju FC, mu gihe APR FC izakira Police FC saa 18:30.
Police FC iri ku mwanya wa mbere n’amanota 22 ikurikiwe na APR FC na Gasogi United ziganya amanota 18, Rayon Sport ya kane ifite amanota 17, mu gihe Kiyovu na Musanze FC ziganya 16.
