Igitego cya Mael Dindjek ku munota wa 35, cyaraye gifashije Rayon Sports gutsinda AS Kigali 1-0 mu mukino w’Umunsi wa 24 wa Shampiyona watanze ibyishimo ku bakunzi b’iyi kipe batari bake kuri Stade ya Kigali i Nyamirambo ku wa Gatandatu.
Iyi ntsinzi yatumye Rayon Sports igeza amanota 41 ku mwanya wa gatatu w’urutonde rw’agateganyo rwa Shampiyona mu gihe hasigaye imikino itandatu.
Abakunzi ba Rayon Sports bari i Nyamirambo, bagaragaje akanyamuneza kadasanzwe ubwo umukino wari urangiye ndetse abayobozi bayo barangajwe imbere na Perezida wayo, Uwayezu Jean Fidèle, bajya gukomera amashyi hamwe n’abakinnyi.
Ambasaderi w’Umuryango w’Ubumwe bw’u Burayi mu Rwanda, Nicola Bellomo, ni umwe mu bari bitabiriye uyu mukino. Yasangije amashusho abamukurikira kuri Twitter, umuhungu we ahetswe ku rutugu na rutahizamu wa Rayon Sports, Manace Mutatu Mbedi.
Aya mashusho yayakurikije amagambo agira ati “Mwishyuke Rayon Sports kandi mwakoze cyane ku buryo mwatwakiriye neza kuri Stade i Nyamirambo. Umuhungu wagize isabukuru natwe twese twishimiye umukino n’ibirori bya nyuma yawo! #Gikundiro.”
⚽️⚽️⚽️ Congratulations @rayon_sports and thanks for the warm welcome at #Nyamirambo Stadium. The birthday boy 🎂 and all of us enjoyed the game and the post-game celebrations ! #Gikundiro pic.twitter.com/0wsHZsibtg
— nicola bellomo (@nicolabellomo) April 23, 2022
Rayon Sports imaze iminsi yitwara neza kuko wari umukino wa gatatu wikurikiranya ibona intsinzi ndetse ikaba iheruka gusezerera Musanze FC muri 1/8 cy’Igikombe cy’Amahoro.
Gikundiro izasubira mu kibuga ku wa Kabiri, tariki ya 26 Mata saa Kumi n’ebyiri, ubwo izaba yakiriye Bugesera FC mu mukino ubanza wa ¼ cy’Igikombe cy’Amahoro uzabera kuri Stade ya Kigali.
Perezida wa Gorilla FC, Mudaheranwa Hadji Youssuf
Muhire Jean Paul wabaye Visi Perezida wa Rayon Sports
Muhirwa Prosper wigeze kuba Visi Perezida wa Rayon Sports
Mupenzi Eto’o ushinzwe igura n’igurisha ry’abakinnyi muri APR FC (iburyo)
Perezida wa Rayon Sports, Uwayezu Jean Fidèle, yari yaje kuyishyigikira
Umunyamabanga Mukuru wa FERWAFA, Muhire Henry
Umunyamabanga Mukuru wa AS Kigali, Gasana Francis
Umusifuzi Uwikunda Samuel ari mu barebye uyu mukino
Umutoza Cassa Mbungo Andre yari yaje kureba Rayon Sports yatoje
Ambasaderi w’Umuryango w’Ubumwe bw’u Burayi mu Rwanda, Nicola Bellomo, yashimishijwe n’uburyo Rayon Sports yabakiriye ku mukino
Amafoto: Renzaho Christophe
