MU MAFOTO 150: Makamburu FC yasezereye Nyabihu y’abarimo Mutebi Rashid mu irushanwa ryo kurwanya ibiyobyabwenge

Umukino wa nyuma uzaba ari “Umuvure Derby” nyuma y’uko ibitego byatsinzwe na Mutebi Rashid ntacyo byafashije Ikipe ya Nyabihu yatsinzwe n’iya Makamburu FC kuri penaliti 5-4 nyuma yo kunganya 2-2 mu mukino wa ½ cy’irushanwa ryo kurwanya ibiyobyabwenge wabereye kuri Stade Ubworoherane ku Cyumweru, tariki ya 29 Gicurasi 2022.

Kimwe n’undi mukino wa ½ wabaye ku wa Gatandatu, n’abakinnye ku Cyumweru bari biganjemo amazina akomeye amenyerewe muri Shampiyona y’Icyiciro cya Mbere mu Rwanda.

Abakinnyi bitabajwe n’impande zombi mu gushyigikira iri rushanwa, basanzwe bakina mu makipe akomeye nka Etincelles, Musanze FC, Marines FC na Gasogi United; barimo Habyarimana Eugène, Kanamugire Moses, Nkundimana Fabio, Harrison Chukuwiji, Mussa Ali Sova na Nduwayezu Jean Paul.

Hari kandi Akayezu Jean Bosco, Kazindu Bahati, Kaneza Augustin, Bizimana Omar, Isenewe Cristian, Ntwari Jacques, Mugiraneza Frodouard, Iradukunda Barthlemy na Tuyisenge Pekeake ‘Pekinho’, Irokan Samson, Mutebi Rachid na Nzeyurwanda Djihad.

Makamburu FC yari yafunguye amazamu mu minota ya nyuma y’igice cya mbere ku gitego cyatsinzwe n’Umunya-Nigeria Harrison Chukuji , yatsinze icya kabiri nyuma y’iminota ibiri amakipe yombi avuye kuruhuka, cyinjijwe na Nkurunziza Olivier ku ishoti rikomeye yatereye inyuma y’urubuga rw’amahina.

Mutebi Rashid wagiye mu kibuga asimbuye ni we watsinze ibitego byombi byo kwishyura ku ruhande rwa Nyabihu ndetse yashoboraga gutsinda icya gatatu mu minota ya nyuma, umupira yateresheje umutwe ukubita umutambiko w’izamu ujya hanze.

Ubwo iminota 90 yari irangiye ari ibitego 2-2, hitabajwe penaliti, Makamburu FC itsinda 5-4. Ndikumana Fabio usanzwe ukinira Musanze FC ni we wahushije penaliti ya Makamburu FC naho Mutebi Rashid wa Etincelles FC na Kaneza Augustin wa Gasogi United bahusha penaliti za Nyabihu.

Ku mukino wa nyuma uzaba mu kwezi gutaha, Makamburu FC izahura na CETRAF FC mu mukino uzwi nka “Umuvure Derby” kubera ko amakipe yombi ari ay’inganda zikora inzoga.

Ubwo aya makipe yari kumwe mu Itsinda A ry’iri rushanwa, Makamburu yatsinze CETRAF FC ibitego 2-1 mu minota ya nyuma.

Amakipe umunani yo mu turere twa Musanze, Gakenke na Nyabihu ni yo yari yitabiriye aya marushanwa y’umupira w’amaguru abera kuri Stade Ubworoherane mu rwego rwo kurwanya ibiyobyabwenge mu rubyiruko.

Abafatanya bikorwa muri iri rushanwa ni Musanze wine, Makamburu wine, Meraneza, Next Bar, Mukungwa River Side Night Club, Ntagipfubusa Ltd, Masita na Canal Plus Musanze.

Ikibazo cy’ibiyobyabwenge mu rubyiruko kiri mu bihangayikishije inzego zitandukanye mu Rwanda kuko hari abo bitera kugira agahinda gakabije.

Inyigo y’Ikigo gishinzwe Ubuzima (RBC) yo muri 2018 igaragaza ko Abanyarwanda barenga ibihumbi 200 biganjemo urubyiruko, bagezweho n’uburwayi bwo mu mutwe biturutse ku kunywa inzoga n’ibindi biyobyabwenge.

Yagaragaje ko abenshi mu bagezweho n’uburwayi ari urubyiruko ruri mu kigero cy’imyaka hagati ya 12-35, ndetse ko ½ cy’Abanyarwanda bari muri iki kigero bakoresheje ibiyobyabwenge nibura rimwe mu buzima bwabo.

Abakinnyi babanje mu kibuga ku mpande zombi:

Makamburu FC: Bimenyimana Patrick, Habyarimana Eugène, Kanamugire Moses, Dukundane Jean d’Amour, Sebatware Andre, Munezero Jasmir, Nkurunziza Olivier, Nkundimana Fabio, Harrison Chukuwiji, Mussa Ali Sova na Nduwayezu Jean Paul.

Abasimbura: Niyitegeka Jean Marie Vianney, Ishimwe Thierry, Rwego Willy, Mugabe Tresor, Irakiza Aime Desiré, Ayodere Victor, Tuyishime Alain Christian na Habumugisha Felicien.

Nyabihu: Ndagijimana Innocent, Akayezu Jean Bosco, Nsabimana Hussein, Kazindu Bahati, Kaneza Augustin, Bizimana Omar, Isenewe Cristian, Ntwari Jacques, Mugiraneza Frodouard, Iradukunda Barthlemy na Tuyisenge Pekeake ‘Pekinho’.

Abasimbura:Munyurangabo Raymond, Irokan Samson, Mutebi Rachid, Ngabonziza Patrick, Mupaya Egide, Karekezi Faustin, Habineza Isaac, Mfashingabo Ernest na Nzeyurwanda Djihad.

.

Amafoto: Renzaho Christophe

IZINDI NKURU
Ibitekerezo(0)
Tanga Igitekerezo