Ku mugoroba wo ku wa Kabiri, tariki ya 30 Kanama 2022, Minisitiri wa Siporo, Munyangaju Aurore Mimosa uri mu ruzinduko rw’akazi mu Karere ka Huye, yasangiye n’Amavubi yitegura gukina na Ethiopia mu mukino w’ijonjora rya nyuma ryo gushaka itike ya CHAN izaba mu mwaka utaha.
Amavubi azakira Ethiopia ku wa Gatandatu tarki ya 3 Nzeri mu mukino wa mbere uzakinirwa kuri Stade ya Huye imaze amezi ane ivugururwa.
Umukino ubanza w’ijonjora rya nyuma wahuje ibihugu byombi ku wa Gatanu w’icyumweru gishize, tariki ya 26 Kanama 2022, warangiye binganyije ubusa ku busa.
Nyuma yo kugaruka mu Rwanda ivuye muri Tanzania ahabereye uwo mukino ubanza, Ikipe y’u Rwanda yahise ikomereza i Huye ahazabera umukino wo kwishyura.
Ku Cyumweru ni bwo Amavubi yakoze imyitozo ya mbere kuri iyi Stade ya Huye yakira abantu 7900 yari imaze iminsi ivugururwa kugira ngo ibashe kwakira imikino mpuzamahanga.
U Rwanda ruzaba rusabwa gutsinda uko byagenda kose kugira ngo rwizere gukina iri rushanwa rihuza abakinnyi bakina imbere muri za shampiyona zabo ku nshuro ya kane yikurikiranya.
Rwakiriye CHAN 2016 yabereye i Kigali, runitabira iyabereye muri Cameroun mu mwaka ushize. Nirubigeraho, izaba ari inshuro ya gatanu muri rusange nyuma yo kwitabira CHAN 2011 yabereye muri Sudani.
Ku mugoroba w'ejo hashize Minisitiri wa Siporo @AMunyangaju , Umuyobozi w'Akarere ka Huye @A_sebutege , Perezida wa FERWAFA @OlivierNMugabo n' Umunyambanga Uhoraho muri MINISPORTS @SMDidier1 basuye @AmavubiStars muri Hotel Mater Boni Consili aho bitegurira umukino wa Ethiopia. pic.twitter.com/sXkqkNsYY5
— Rwanda FA (@FERWAFA) August 31, 2022
Muri uru ruzinduko rw’akazi Minisitiri wa Siporo yagiriye i Huye, biteganyijwe ko kuribuyu wa Gatatu asura Stade ya Huye hagenzurwa aho imyiteguro yo kwakira umukino wa Ethiopia igeze.
