Umufaransa Kylian Mbappé ayoboye urutonde rw’abakinnyi b’umupira w’amaguru bahembwa amafaranga menshi, aho ku nshuro ya mbere yahigitse abarimo Lionel Messi na Cristiano Ronaldo baruyoboye imyaka icyenda.
Uru rutonde rwakozwe na Forbes, rugaragaza ko Mbappé w’imyaka 23, azinjiza miliyoni 128$ (asaga miliyari 135 Frw) muri uyu mwaka w’imikino.
Mugenzi we bakinana muri Paris Saint-Germain, Messi, ari ku mwanya wa kabiri na miliyoni 120$ naho rutahizamu wa Manchester United, Cristiano Ronaldo, ni uwa gatatu na miliyoni 100$.
Neymar na Mohamed Salah buzuza indi myanya ibiri isigaye muri batanu ba mbere aho bazabona miliyoni 87$ na miliyoni 53$ muri uyu mwaka w’imikino wa 2022/23.
Umukinnyi waherukaga kuyobora uru rutonde utari Messi cyangwa Ronaldo yari Umwongereza David Beckham mu 2013.
Kuyobora uru rutonde, Mbappé yabifashijwemo no kongera amasezerano ahenze muri PSG muri Gicurasi uyu mwaka, yatumye aterekeza muri Real Madrid.
Uyu mukinnyi wafashije u Bufaransa gutwara Igikombe cy’Isi mu 2018, amaze kwegukana ibikombe 11 mu makipe birimo bine bya Ligue 1 kuva avuye muri Monaco, bwa mbere ku ntizanyo mu 2017.
Erling Haaland umaze gutsinda ibitego 19 mu mikino 12 akinira Manchester City kuva avuye muri Borussia Dortmund, ari ku mwanya wa gatandatu ndetse ni ubwa mbere aje mu 10 ba mbere.
Haaland na Mbappé nib o bakinnyi bari ku rutonde rw’abakinnyi 10 ba mbere, bari munsi y’imyaka 10.
Urutonde rw’abakinnyi bazahembwa amafaranga menshi muri uyu mwaka w’imikino
- Kylian Mbappe, PSG a& France, $128m (£115.2m)
- Lionel Messi, PSG & Argentina, $120m (£108m)
- Cristiano Ronaldo, Manchester United & Portugal, $100m (£90m)
- Neymar, PSG & Brazil, $87m (£78.4m)
- Mohamed Salah, Liverpool & Egypt, $53m (£47.7m)
- Erling Haaland, Manchester City &Norway, $39m (£35.1m)
- Robert Lewandowski, Barcelona & Poland, $35m (31.5m)
- Eden Hazard, Real Madrid & Belgium, $31m (£27.9m)
- Andres Iniesta, Vissel Kobe & Spain, $30m (£27m)
- Kevin de Bruyne, Manchester City & Belgium, $29m (26.1m)
