Manchester United yagize umwe mu mikino myiza kuva itangiye gutozwa na Erik ten Hag, yatsinze Tottenham ibitego 2-0 ku munsi wa 10 wa Shampiyona y’Icyiciro cya Mbere mu Bwongereza, Premier League.
Ibitego byabonetse muri uyu mukino ntibijyanye n’uburyo Manchester United yawubonyemo aho yashoboraga kubirenza iyo itagorwa n’umunyezamu Hugo Lloris wigaragarije kuri Old Trafford.
Kapiteni wa Tottenham, Lloris, yakuyemo imipira itanu ikomeye mu gice cya mbere mu mashoti 19 yageragejwe na Manchester United.
Nyuma y’iminota ibiri amakipe yombi avuye kuruhuka, Fred yafunguye amazamu ku mupira yahawe na Jadon Sancho, awuteye ukora ku kuguru kwa Ben Davies ujya mu izamu.
Manchester United yashoboraga kubona ibindi bitego ku buryo bw’abarimo Marcus Rashford na Fred, yatsinze igitego cya kabiri ku munota wa 69, cyinjijwe na Bruno Fernandes warobye umunyezamu Lloris.
Uburyo bubiri bukomeye Tottenham yabonye muri uyu mukino ni amashoti yatewe na Harry Kane, asubizwa inyuma na David De Gea.
Gutsinda uyu mukino byatumye Manchester United iguma ku mwanya wa gatanu n’amanota 19, irushwa amanota umunani na Arsenal ya mbere mu gihe Tottenham yabuze amahirwe yo kujya imbere ya Manchester City ya kabiri, zinganya amanota 23.
Mu yindi mikino yabaye, Chelsea ya kane n’amanota 20, yanganyirije kwa Brentford ubusa ku busa naho Liverpool ya karindwi n’amanota 16 itsinda West Ham United igitego 1-0 cyinjijwe na Darwin Nunez.
Newcastle United ifite amanota 18 ku mwanya wa gatandatu nyuma yo gutsinda Everton 1-0 naho Southampton yagize amanota 11 ku mwanya wa 14 nyuma yo gutsindira AFC Bournemouth iwayo igitego 1-0.
David De Gea yakuyemo imipira ibiri yatewe na Harry Kane
Hugo Lloris yakuyemo imipira itandukanye irimo uwa Fred na Shaw
Ishoti ryatewe na Antony mu minota ya mbere, ryanyuze ku ruhande rw’izamu
Marcus Rashford yahushije uburyo bubiri bukomeye muri uyu mukino
Fred yatsinze igitego cya mbere ku ishoti ryakoze kuri myugariro wa Tottenham
Bruno Fernandes atsinda igitego cya kabiri
Byari ibyishimo ku bakinnyi ba Manchester United ubwo umukino wari urangiye
Manchester United yarushije cyane Tottenham
