Liverpool yageze ku mukino wa nyuma w’irushanwa rihuza amakipe yabaye aya mbere iwayo i Burayi, UEFA Champions League, nyuma yo gutsinda Villarreal bitego 3-2, iyisezerera ku giteranyo cy’ibitego 5-2 muri ½.
Villarreal yari yakiriye umukino wo kwishyura muri Espagne, yafunguye amazamu hakiri kare ku gitego cyinjijwe na Boulaye Dia ku munota wa gatatu gusa.
Étienne Capoue wamuhereje umupira, yatanze kandi undi wavuyemo igitego cya kabiri ku munota wa 41, cyinjijwe na Francis Coquelin.
Igice cya mbere cyarangiye byose bigishoboka ku makipe yombi dore ko yanganyaga igiteranyo cy’ibitego 2-2 mu mikino yombi.
Mu gice cya kabiri, Liverpool yasatiriye bikomeye ndetse ibona ibitego bitatu byihuse mu gice cy’iminota 12.
Ku munota wa 62, Fabinho yatsinze igitego ku ishoti rikomeye yateye rigaca mu maguru y’umunyezamu wa Villarreal nyuma yo guherezwa na Mohamed Salah.
Nyuma y’iminota itanu, Luis Díaz yishyuye igitego cya kabiri ku mupira wari uvuye kuri Trent Alexander-Aarnold mu gihe Sadio Mané yatsinze icya gatatu ku munota wa 74 aherejwe na Naby Keïta.
Villarreal yasoje umukino ari abakinnyi 10 mu kibuga kuko Étienne Capoue yahawe ikarita ya kabiri y’umuhondo ku munota wa 86.
Iyi ntsinzi yatumye Liverpool igera ku mukino wa nyuma wa UEFA Champions League uzakinirwa i Paris, kuri Stade de France, tariki ya 28 Gicurasi ndetse izahura n’ikipe ikomeza hagati ya Real Madrid na Manchester City kuri uyu wa Gatatu saa Tatu z’ijoro.
Mu mukino ubanza wabereye mu Bwongereza, Manchester City yatsinze Real Madrid ibitego 4-3.
