Paris Saint-Germain yegukanye Igikombe cya Shampiyona y’u Bufaransa ku nshuro ya 10 nyuma yo kunganya na Lens y’abakinnyi 10 igitego 1-1 ku wa Gatandatu.
Lionel Messi uri gukina umwaka we wa mbere muri PSG, ni we wayitsindiye igitego ku munota wa 68, ku mupira yaherejwe na Neymar.
Lens yari abakinnyi 10 mu kibuga nyuma y’uko Kevin Danso ahawe ikarita ya kabiri y’umuhondo ku munota wa 57, yishyuriwe na Corentin Jean ku munota wa 88.
Kunganya uyu mukino byatumye umutoza Mauricio Pochettino yegukana Igikombe cya Shampiyona ku nshuro ya mbere ari muri Paris Saint-Germain.
Abafana bayo ntibishamanye n’ikipe ahubwo bahisemo gusohoka ku munota wa 75 bajya kwishimira hanze kubera kutishimira uburyo ikipe yasezerewe na Real Madrid muri Champions League.
Abakinnyi ba PSG bavugirijwe induru n’abafana ubwo igice cya mbere cyarangiraga ari ubusa ku busa kandi ikaba yashoboraga gutsindwa igitego ku mupira wa Jonathan Clauss wakuwemo na Keylor Navas mu minota 45 ibanza.
Kuri ubu Paris Saint-Germain yegukanye igikombe cya Shampiyona mu mwaka w’imikino wa 1985/86, 1993/94, 2012/13, 2013/14, 2014/15, 2015/16, 2017/18, 2018/19, 2019/20 na 2021/22.
