Ubusabe bwo guhindura izina ry’ikipe y’igihugu ya Bénin y’umupira w’amaguru ikava ku Inkima ikitwa Intarangwe/urutarangwe (guépards/Cheetahs) butegerejwe kwemezwa na guverinoma.
Mathurin de Chacus ni we watangaje iki cyifuzo nyuma y’uko atorewe manda ya kabiri yo gutegeka ishyirahamwe ry’umupira w’amaguru muri Bénin (FBF) muri ’weekend’.
Les Ecureuils, bisobanuye Inkima mu Kinyarwanda, ryahawe iyi kipe mu myaka ya za 1960 – bisa n’ibisobanura igihugu gito kigamije kugera ku bikomeye.
Ariko Mathurin, uri mu bagize inteko ya FIFA, avuga inama y’ubutegetsi ya FBF yahisemo izina Intarangwe mu gusobanura intego z’ikipe y’igihugu.
FBF ivuga ko yizeye ko Minisitiri w’imikino Oswald Homeky azashyigikirwa na guverinoma ikemeza ibi mbere y’uko bakina n’u Rwanda umukino w’amajonjora y’igikombe cya Africa cya 2023 muri Werurwe(3) umwaka utaha.
Ikipe y’u Rwanda nayo bamwe mu bakunzi bayo bagiye bavuga ko izina ryayo Amavubi ridakwiye iyo kipe basaba ko rihindurwa.
Gusa ibyo bavuga ntibiraba ingingo yigwaho mu buryo buzwi n’abashinzwe umupira w’amaguru mu Rwanda.
Mathurin wa Bénin we ati: “Kuva uno munsi, ntihazongera kubaho inkima muri Bénin ku rwego rw’umupira w’amaguru. Kuva ubu, abakinnyi bacu bazajya bitwa intarangwe.”
Bénin ni iya 91 ku rwego rw’isi, nta na rimwe irajya mu gikombe cy’isi ariko imaze gukina igikombe cya Africa inshuro enye; 2004, 2008, 2010 na 2019.
Inkima zagiye zirokoka kuzigizayo
Mu 2008, ukundi kubigerageza nk’uko kwaranzwe, mu 2018 nabwo hakozwe ikusanyabitekerezo kuri internet rigamije gukuraho Inkima.
Steve Mounié, umukinnyi mpuzamahanga wa Bénin ukina muri Huddersfield Town mu cyiciro cya kabiri mu Bwongereza, ashyigikiye guhindura Inkima, ndetse yifuje ko ikipe ya Bénin yakwitwa Inziramire/uruziramire.
Mu 2019 inkima za Bénin zageze muri 1/4 cy’igikombe cya Africa - ari nabwo zigiherukamo - zitsinze Maroc bitunguranye kuri za penaliti, ariko zananiwe kujya mu cyabereye muri Cameroun mu ntangiriro z’uyu mwaka.
Bénin ubu ni iya nyuma mu itsinda L ryo gushaka tike y’igikombe cya Africa cya 2023 nyuma yo gutsindwa na Senegal na Mozambique muri Kamena(6).
Iri tsinda riyobowe na Sénégal n’amanota atandatu, Mozambique n’amanota ane, Amavubi n’inota rimwe, n’Inkima, zishaka kwitwa Intarangwe, ubu zigifite ubusa.
BBC
