Perezida wa Gasogi United, Kakooza Nkuriza Charles (KNC), yashimangiye ko Kiyovu Sports ari yo kipe iciriritse mu zo bahura na zo zose ndetse ko atari ikipe ikomeye uretse ikuzo ihabwa n’abanyamakuru.
KNC yabivuze nyuma y’umukino w’Umunsi wa 23 wa Shampiyona aho Gasogi United yatsinze Kiyovu Sports ibitego 2-0 ku wa Gatanu.
Ati “Oya, nta mbamutima dufite kuri Kiyovu kuko ni ikipe iciriritse kuri twe kandi mwabibonye. Sintekereza ko hari ibyo kwishimira birenze kandi twahuye n’ikipe yoroshye cyane mu zo duhangana na zo. Sinzi icyo navuga.”
Yakomeje agira ati “Narabibabwiye no mu kiganiro n’abanyamakuru gitegura umukino, mbabwira ko tutayitsinze ibitego bibiri twaba duhombye. Byari byo ko tugomba kuyitsinda mu gice cya mbere n’icya kabiri kandi ni byo twakoze. Mwampa amashyi? [Abanyamakuru barayamuha]”
“Ni amateka, Kiyovu yigeze itsinda ryari Gasogi? Uretse mwe abanyamakuru mwayihaye ikuzo, mukayizamura. Narabivuze ko iyi ari yo kipe iri ihasi imbere ya Gasogi, imbere y’abandi simbizi. Perezida w’abafana yarabivuze ejo [ku wa Kane] ko Kiyovu ari ikipe yacu, tuyigendana mu mufuka, tuyikora ibyo dushatse igihe dushakiye.”
Abajijwe ku ihangana rye na Mvukiyehe Juvénal uyobora Kiyovu Sports, KNC yavuze ko biyunze nyuma y’umukino ndetse kuri ubu Urucaca ruri mu makipe y’inshuti na Gasogi United.
Ati “Juvénal ndamuhobeye, fairplay ubu birarangiye. Navuze ko ndibwihorere mu kibuga kandi ndabikoze. Ubu noneho Kiyovu tuyivanye mu makipe twita ko tutabanye neza, ubu ni inshuti yacu.”
Mu mikino irindwi imaze guhuza amakipe yombi kuva mu 2019, Gasogi United yatsinzemo ine, Kiyovu Sports itsinda umwe naho amakipe yombi anganya ibiri isigaye.
Gutsinda uyu mukino wo ku wa Gatanu byatumye Gasogi United ifata umwanya wa cyenda n’amanota 26 inganya na Marines FC mu gihe Kiyovu Sports yakomeje kugira amanota 50 ku mwanya wa mbere, irusha abiri APR FC izakirwa na Bugesera FC ku Cyumweru.
Gasogi United yatsinze Kiyovu Sports ibitego 2-0 ku wa Gatanu
KNC yavuze ko Kiyovu Sports ari ikipe iciriritse imbere ya Gasogi United
Mvukiyehe Juvénal uyobora Kiyovu Sports, akurikye uyu mukino wabaye ku wa Gatanu
Nyuma y’umukino, KNC ATI "Juvenal!Nihoreye mu kibuga none ndakubabariye"
