Rutahizamu mpuzamahanga w’Umunyarwanda akaba na Kapiteni w’Ikipe y’Igihugu, Meddie Kagere, yatandukanye na Simba SC yari amaze imyaka ine akinira.
Kagere wari ugifite amasezerano y’umwaka umwe, ntiyabonye umwanya uhagije wo gukina mu mwaka w’imikino wa 2021/22 yatsinzemo ibitego birindwi gusa.
Kuri uyu wa Kane ni bwo Simba SC yatangaje ko uyu Kapiteni w’Amavubi atazakomezanya na yo kimwe n’abarimo Umunye-Congo Chris Mugalu n’Umugande Taddeo Lwanga.
Uyu rutahizamu w’Umunyarwanda akaba yatangajwe nk’umukinnyi mushya wa Singida Big Stars FC nayo yo muri Tanzania.
Kagere Meddie yageze muri Simba SC mu mpeshyi ya 2018 aguzwe muri Gor Mahia yo muri Kenya ku masezerano y’umwaka umwe.
Mu mwaka wa mbere ykiniyemo na Simba SC, yayitsindiye ibitego 34 birimo 23 bya shampiyona mu mikino 52 yakinnye mu mwaka w’imikino 2018/19, aho yanatowe nk’umukinnyi w’umwaka muri Simba SC nyuma yo kuyitsindira ibitego byinshi.
Kagere Meddie ni umugabo w’imyaka 36 yashakanye n’Umunyarwandakazi. Uyu rutahizamu yavukiye muri Uganda ku wa 10 Ukwakira 1986.
Yakiniye Ikipe ya Mbale Heroes FC hagati ya 2004-2006. Yahavuye ahita aza mu Rwanda mu Ikipe ya Atraco FC mu 2006. Nyuma y’umwaka umwe yagiye muri Kiyovu Sports yavuyemo yerekeza muri Mukura Victory Sports mu mwaka w’imikino 2008-2009 kugeza mu 2010 ubwo yajyaga muri Police FC, aho yakinnye imikino 40 agatsinda ibitego 38.
Mu 2012 yerekeje muri ES Zaris yo muri Tunisia atamazemo igihe, ahita agaruka muri Police FC.
Nyuma yaho yakinnye muri Rayon Sports, aho mu mikino 12 ya shampiyona yo kwishyura, yatsindiye iyi kipe yambara ubururu n’umweru ibitego umunani.
Mu 2014 yerekeje muri Albania mu ikipe ya KF Tirana, batandukanye tariki ya 1 Mutarama 2015, basheshe amasezerano.
Mu mwaka wa 2015, nibwo Kagere Meddie yatangiye gukinira Gor Mahia afite amasezerano y’umwaka umwe, aho yayitsindiye ibitego 31 mu mikino yose yakinnye, ariko bananirwa kumvikana ku masezerano mashya, batandukana muri Mutarama.
Gor Mahia yamugaruye nyuma y’amezi atandatu, aho yayivuyemo mu mwaka ushize ajya muri Simba SC.
Kagere ni umukinnyi w’Ikipe y’Igihugu Amavubi kuva mu 2011, ubwo u Rwanda rwatsindaga Bénin igitego 1-0 akaba ari we ugitsinda.
Mu 2015 na we yahagaritswe mu nkubiri y’abanyamahanga mu Amavubi, yongera guhamagarwamo mu mwaka ushize ubwo u Rwanda rwatsindwaga na Côte d’Ivoire ibitego 2-1, akaba ari na we utsinda iki gitego.
