Rutahizamu w’Umunya-Nigeria Samson Irokan Ikechukwu n’umunyezamu Twagirimana Pacifique, biyongereye ku mubare w’abakinnyi bamaze gutandukana na Musanze FC.
Kuri iki Cyumweru, tariki ya 26 Kamena 2022, Musanze FC yatangaje ko itazakomeza na Samson Irokan Ikecukwu ndetse n’umunyezamu Twagirimana Pacifique, bombi bari bamaze imyaka ibiri bayikinira.
Samson Irokan Ikechukwu yageze muri Musanze FC muri Kanama 2020, avuye muri Lobi Stars FC y’iwabo muri Nigeria.
Muri Mutarama 2019, yigeze kwerekeza mu igeragezwa muri Nakhon Ratchasima FC yo mu cyiciro cya mbere muri Thaïlande ku mugabane wa Aziya, ariko birangira asubiye muri Bugesera FC yakiniye kugeza muri Nyakanga uwo umwaka
Twagirimana Pacifique yamenyekaniye mu ikipe y’abanyamakuru ba siporo mu Rwanda ‘AJSPOR FC’, ayivamo yerekeza mu Amagaju FC kugeza mu 2019 ubwo iyi kipe y’i Nyamagabe yasubiraga mu Cyiciro cya Kabiri.
Mu mpera z’uwo mwaka, yahise yerekeza muri Bugesera FC, ayikinira umwaka umwe mbere yo kugurwa na Musanze FC yari amazemo imyaka ibiri.
Aba bakinnyi bombi basezerewe, biyongereye ku bandi batanu barimo Niyitegeka Idrissa, Tuyisenge Niyonkuru Vivien, Ndagijimana Ewing, Uzayisenga Maurice ‘Jay’ na Niyonsenga Ibrahim ‘Kibonge’ byamaze kwemezwa ko batazakomezanya na Musanze FC yabaye iya gatandatu mu mwaka ushize w’imikino wa 2021/22.
Samson Irokan Ikechukwu
Umunyezamu Twagirimana Pacifique
