Guhera tariki ya 3 Nzeri kugeza ku ya 1 Ukwakira 2022, Ihuriro rya za Banki zikorera mu Rwanda “RBA” ryongeye gutegura irushanwa rihuza za Banki zikorera mu Rwanda nyuma y’imyaka itatu ritaba kubera icyorezo cya COVID-19.
Iri rushanwa rihuza za Banki zikorera mu Rwanda “Interbank Sports Tournament 2022”, ryatangiye ku wa Gatandatu tariki ya 3 Nzeri, ryitabiriwe na Banki 10 muri 15 zigize ihuriro.
Muri iri rushanwa hateganyijwe guhatana mu mikino ine ari yo umupira w’amaguru, Volleyball, Basketball ndetse no Koga ‘Swimming”. Uretse mu cyiciro cyo Koga, ahandi hose ni amakipe y’abagabo gusa.
Imikino ihuza za Banki “Interbank Sports Tournament 2022” izakinira ku bibuga bya IPRC Kigali, kuri Stade Mumena no muri Notre Dame des Anges i Remera .
Natacha Haguma, Umuyobozi wa Kompanyi izobereye mu gutegura ibirori "General Logistic Services (GLS)" ifatanya na RBA gutegura iri rushanwa, yatangaje ko iyi mikino yari imaze iminsi itaba kubera COVID-19 ari ko ubu yagarutse kandi bizeye ko izagenda neza.
Yagize ati “Iri rushanwa rimaze imyaka itatu ritangiye, ryatangiye mu 2015 ariko rikaba ryari ryarahagaze mu 2019 kubera COVID-19, ariko ubu rikaba ryasubukuwe uyu mwaka. Dufite insanganyamatsiko igira iti “Building the industry of healthier Bankers”, ni ukuvuga ngo turashaka ko bakora akazi kabo bafite ubuzima buzira umuze.”
Yakomeje avuga ko nubwo mu byiciro byinshi harimo amakipe y’abagabo, bizeye ko n’abagore bazagenda bitabira mu bihe biri imbere.
Muri iri rushanwa hazabaho gupima uko ubuzima buhagaze ku bakozi bose ba za Banki.
Iri huriro rya za Banki mu Rwanda "RBA" ryatangiye muri 2009 naho imikino ihuza izi Banki itangira gukinwa muri 2015.
Imikino ihuza za Banki yari imaze imyaka itatu itaba kubera COVID-19
Natacha Haguma (uwa kabiri uhereye iburyo) ni we Muyobozi wa GLS izobereye mu gutegura ibirori
Amakipe yatabiriye mu mikino itandukanye
Mu mupira w’amaguru hitabiriye amakipe 8 agabanyije mu matsinda abiri. Itsinda A ririmo Urwego, Bank of Africa, BK na Cogebanque naho itsinda B ririmo Equity Bank, Acces Bank, I&M Bank na BPR. Amakipe azakina imikino y’amajonjora mu matsinda, amakipe 2 ya mbere akomeze muri ½ cy’irangiza.
Imikino y’amajonjora izasozwa taliki 19 Nzeri 2022 hanyuma taliki 24 na 25 Nzeri 2022 habe imikino ya ½ ubundi taliki 01 Ukwakira 2022 habe umukino wo guhatanira igikombe uzabanzirizwa n’uwo guhatanira umwanya wa 3.
Ku munsi wa mbere wo mu matsinda, BK yatsinze Cogebanque ibitego 19-0, I&M Bank inganya na BPR 3-3, Urwego itsindwa na Bank of Africa ibitego 14-1 naho Equity itsinda Access ibitego 19-0.
Muri Basketball hitabiriye amakipe arindwi ashyirwa mu matsinda abiri, itsinda A ririmo BK, I&M Bank na Cogebanque naho itsinda B ririmo Equity Bank, BPR, Ecobank na Access Bank.
Ku munsi wa mbere, BK yatsinze Cogebanque amanota 124-24, Equity itsinda Access Bank amanota 20-0 naho BPR itsinda Ecobank 53-17.
Aha imikino y’amajonjora mu matsinda izasozwa taliki 17 Nzeri 2022 hanyuma taliki 25 Nzeri 2022 habe imikino ya ½ ubundi taliki 01 Ukwakira 2022 habe umukino wa nyuma n’uwo guhatanira umwanya wa gatatu.
Muri Volleyball hitabiriye amakipe 4 ari yo BK, Cogebank, Ecobank na BPR. Aya makipe agomba gukina hahati yayo kugeza taliki 18 Nzeri 2022.
Ku munsi wa mbere, Cogebanque yatsinzwe na BK amaseti 3-0 na Ecobank itsindwa na BPR amaseti 3-0.
Mu mikino ya ½ iteganyijwe taliki 25 Nzeri 2022, ikipe ya mbere izakina n’iya 4 hanyuma iya kabiri ikine n’iya 3 izitwaye neza zihurire ku mukino wa nyuma taliki 01 Ukwakira 2022.
Imikino y’umunsi wa kabiri w’amajonjora (mu matsinda) izaba tariki ya 10 n’iya 11 Nzeri 2022.
Mu Koga “Swimming” irushanwa rizaba tariki 01 Ukwakira2022 guhera saa tatu (09h00). Abazarushanwa bazakina mu byiciro bitandukanye birimo “Freestyle”, “Backstroke”, "Breaststroke” na “Butterfly”.
